TKSS: અર્ચના સાથે ફ્લર્ટ કરતા જોવા મળ્યા અનિલ કપૂર, કહ્યું- 'ક્યારેક અમને પણ ઘરે બોલાવ'

'ધ કપિલ શર્મા શો' (The Kapil Sharma Show)ને દર્શકો તરફથી ભરપૂર પ્રેમ મળ્યો છે. બે વર્ષથી સુધી સફળતાપૂર્વક ચાલ્યા બાદ આ શો ઓફ-એર થવાનો છે. કપિલ શર્માના આ પોપ્યુલર કોમેડી શોમાં વિવિધ સેલિબ્રિટીઝ પોતાની ફિલ્મો, ગીતો અને અન્ય પ્રોજેક્ટના પ્રમોશન માટે આવતા રહે છે. અહીં ખૂબ મજાક-મસ્તી થાય છે. માત્ર દર્શકો જ નહીં શોમાં મહેમાન તરીકે આવતા કલાકારોને પણ ખૂબ મજા આવે છે.

કપિલ શર્મા શોમાં જજ તરીકે અભિનેત્રી અર્ચના પૂરણ સિંહ જોવા મળે છે. સોશિયલ મીડિયા પર એક્ટિવ રહેતી અર્ચના પૂરણ સિંહ શોના સેટ પરથી બિહાન્ડ ધ સીન (BTS) વિડીયો શેર કરતી રહે છે. હાલમાં જ અર્ચનાએ એક BTS વિડીયો શેર કર્યો છે જેમાં અનિલ કપૂર તેની સાથે હળવી મજાક અને ફ્લર્ટ કરતા જોવા મળે છે. અર્ચના અને અનિલ વચ્ચેની વાતચીત દરમિયાન કપિલ પણ રમૂજ કરે છે. વિડીયોમાં જોઈ શકો છો કે અનિલ કપૂર અર્ચનાને કહે છે કે, 'હલો માય ફેવરિટ અર્ચાન પૂરણ સિંહ લવ યુ ઓલવેઝ. ક્યારેક અમને પણ બોલાવ તારા મઢ આઈલેન્ડવાળા ઘરે.' જવાબમાં અર્ચના કહે છે કે, 'અનુપમ (ખેર) અને સતીષ (કૌશિક) આવ્યા હતા મારા ઘરે.' પછી અનિલ મજાકિયા અંદાજમાં કંઈક કહે છે ત્યારે અર્ચના કહે છે, 'અનિલ તું તો આપણી દોસ્તી ભૂલી ગયો.'


આ વિડીયો શેર કરતાં અર્ચનાએ લખ્યું હતું, "BTS. ધ કપિલ શર્મા શોના સેટ પર મસ્તી ક્યારેય ખૂટતી નથી. જેમણે હજી સુધી AK vs AKના જોયું હોય તે જુઓ. આ ફિલ્મમાં તમને ભારતીય સિનેમામાં અગાઉ નહીં જોવા મળેલો રિયલ અને રીલ ડ્રામાં જોવા મળશે. મને જોઈને ખૂબ મજા આવી." જણાવી દઈએ કે, આ મહિનાની શરૂઆતમાં અનિલ કપૂર ફિલ્મ 'AK vs AK'ના પ્રમોશન માટે આવ્યા હતા.


અર્ચના પૂરણ સિંહ ઘણીવાર આ રીતે સેટ પરના ફની વિડીયો શેર કરતી રહે છે. તો આ તરફ ફેબ્રુઆરી 2021માં 'ધ કપિલ શર્મા શો' બંધ થઈ જવાનો છે. કપિલ શર્માએ ટ્વિટર પર પણ આ વાતની પુષ્ટિ કરી હતી. કપિલે ફેન્સ સાથે Q&A સેશન કર્યું હતું. જેમાં તેણે જણાવ્યું હતું કે, પત્ની ગિન્ની બીજીવાર પ્રેગ્નેન્ટ હોવાથી તે પરિવાર સાથે સમય વિતાવવા માગે છે. આ કારણે જ શો થોડા સમય માટે બંધ કરી રહ્યો છે.


શો સાથે જોડાયેલા એક સૂત્રએ અમારા સહયોગી ઈટાઈમ્સ ટીવીને જણાવ્યું હતું કે, લાઈવ ઓડિયન્સ આ શોનો મહત્વનો ભાગ હતો. પરંતુ કોરોના મહામારીના કારણે લાઈવ ઓડિયન્સ બોલાવાનું બંધ કર્યું હતું. આ સિવાય ફિલ્મો પણ રિલીઝ નથી થઈ રહી ત્યારે કોઈ સેલેબ્રિટી પ્રમોશન માટે નથી આવી રહ્યા. માટે જ મેકર્સે નિર્ણય કર્યો કે હાલ બ્રેક લેવો યોગ્ય રહેશે. જ્યારે સ્થિતિ સામાન્ય થઈ જશે ત્યારે શોની નવી સીઝન શરૂ કરવામાં આવશે.