OMG! કેટલી બદલાઈ ગઈ 'બાલિકા વધૂ', ફોટા જોઈને તેના ફેન્સ પણ ચોંકી ગયા

સીરિયલ 'બાલિકા વધૂ'માં 'આનંદી'નો દમદાર રોલ કરીને એક્ટ્રેસ અવિકા ગોરે ખૂબ જ નાની ઉંમરમાં પોતાની જગ્યા બનાવી લીધી. 2008માં લોન્ચ થયેલી આ સીરિયલમાં નાની ઉંમરની 'વહુ'ના રોલથી તેણે દર્શકોના દિલ જીતી લીધા હતા. જે બાદ તેણે ટીવી સીરિયલો અને સાઉથ ઈન્ડિયન ફિલ્મોમાં નોનસ્ટોપ કામ કર્યું. તેણે હાલમાં જ અમારા સહયોગી ટાઈમ્સ ઓફ ઈન્ડિયા સાથે એક્સક્લુઝિવ વાતચીત કરી હતી.


ડેબ્યૂ સીરિયલ બાદ ઈન્ડસ્ટ્રીમાં બ્રેક લીધા વગર સતત કામ કરી રહી છે, આ વાતનો તને કોઈ પસ્તાવો છે તેમ પૂછતાં અવિકાએ કહ્યું કે, ' 'સસુરાલ સિમર કા' ખતમ થયા બાદ અને 'લાડો 2-વીરપુર કી મર્દાની' સાઈન કરતાં પહેલા મેં 2017માં એક વર્ષનો બ્રેક લીધો હતો. આવું મેં એટલા માટે કર્યું કારણ કે હું ખાતરી કરી લેવા માગતી હતી કે મારે એક્ટિંગમાં જ આગળ વધુ છે કે પછી ડાન્સ અને ડિરેક્શનમાં હાથ અજમાવવો છે. એક નવી વ્યક્તિ તરીકે પરત ફરતા પહેલા મેં લાંબો બ્રેક લેવાનો વિચાર કર્યો હતો. પરંતુ મને ખુશી છે કે મેં તેમ કર્યું નહીં. કારણ કે તેનાથી મારા દર્શકો સાથે સંબંધ પર અસર પડત'.


તેણે ભારપૂર્વક જણાવ્યું કે, સતત કામ કરવા છતાં તેણે પોતાનું બાળપણ ગુમાવ્યું નથી. 'જીવનની શરુઆતમાં સફળતા મળે તો તે તમારા પર હાવી થઈ જાય છે. પરંતુ સારી વાત એ છે કે, મારી આસપાસ એવા લોકો છે, ખાસ કરીને મારા માતા-પિતા જેમના કારણે મારા પગ જમીન પર છે. મેં મારું બાળપણ ગુમાવ્યું હોય તેમ મને લાગતું નથી. કારણ કે, હું સ્કૂલે પણ જતી હતી', તેમ એક્ટ્રેસે કહ્યું.


અવિકા ગોરે કહ્યું કે, 'ટેલિવિઝને સ્પોટલાઈટમાં રહેવામાં મને ઘણી મદદ કરી. મને એકાએક લાગ્યું કે જો હું મારું 100 ટકા નહીં આપું તો પણ દર્શકો મને પ્રેમ કરશે. તેથી એક્સ્ટ્રા કરવાની કોઈ જરૂર નહોતી. હું પ્રોફેશનલી સારું કામ કરી રહી હતી પરંતુ ખુશ નહોતી. હું માત્ર ફિઝિકલી જ નહીં પરંતુ મેન્ટલી પણ 100 ટકા નહોતી આપી રહી. હું પહેલા સ્ક્રીનપ્લે લખતી હતી પરંતુ બાદમાં મેં તેના પર ધ્યાન આપવાનું બંધ કરી દીધું. જો કે, મારા બર્થ ડે (30 જૂન) પર મને લાગ્યું કે, મારા દર્શકોને 100 ટકા આપવું જોઈએ'.


એક્ટ્રેસ સોશિયલ મીડિયા પર પણ એક્ટિવ રહે છે. તેણે હાલમાં કેટલીક સુંદર તસવીરો શેર કરી છે. જેમાં તેના અવતારને જોઈને ફેન્સ પણ ચોંકી ગયા. કેપ્શનમાં તેણે લખ્યું છે કે, 'મને હજુ યાદ છે કે, ગયા વર્ષે એક રાત્રે અરીસામાં મારી જાતને જોઈને હું રડવા લાગી હતી. મેં જે જોયું તે મને પસંદ આવ્યું નહીં. મેં ઘણી બાબતોને અવગણી હતી. આ મારી કોઈ બીમારીના કારણે થયું હોત તો ચાલત, પરંતુ આ મારા કંટ્રોલ બહારની વાત હતી. આવું એટલા માટે થયું હતું કારણ કે હું ક્યારેય પણ ગમે તે ખાતી હતી. હું ગમે તે ખાઈ તો લેતી હતી સાથે જ વર્કઆઉટ પણ નહોતી કરતી. આપણા શરીરને દેખરેખની જરૂર પડે છે, પરંતુ મેં કદર કરી નહીં. પરિણામ એ આવ્યું કે હું જેવી દેખાઈ રહી હતી તે મને સારું લાગી રહ્યુ નહોતું. મને ડાન્સમાં પણ મજા આવતી નહોતી. હું પોતાને જજ કરતી હતી અને ખરાબ વિચારતી હતી. બહારવાળુ કોઈ મને કંઈને જાય તેવી તક જ છોડતી નહોતી. મગજમાં અસુરક્ષાની લાગણી રહેતી હતી. હું ઘણીવાર મારા ફેન્સ પર પણ ભડકી જતી હતી'


અવિકાએ વધુમાં લખ્યું છે કે, 'એક દિવસ મેં નક્કી કર્યું કે, બસ હવે બહુ થયું. રાતોરાત કંઈ બદલાયું નથી. મેં માત્ર યોગ્ય વસ્તુઓ પર ફોકસ કરવાનું શરુ કરી દીધું. હું હેલ્ધી ભોજન લેવા લાગી અને વર્કઆઉટ કરવા લાગી. હું અટકુ નહીં તે પણ જરૂરી હતું. મારા નજીકના લોકો મને સતત ગાઈડ કરતાં રહ્યા. પછી એક દિવસ મેં મારી જાતને અરીસામાં જોઈ. મેં મારી સામે જોઈને સ્માઈલ આપી અને મારી જાતને કહ્યું કે હું સુંદર છું. આજે હું અનુકૂળતા અનુભવુ છું. આજે મને શાંતિ લાગે છે'.