નમિશ તનેજાનો આખો પરિવાર કોરોનાની ઝપેટમાં, એક્ટર પણ થયો ક્વૉરન્ટાઈન

કોરોનાના વધતા કહેર વચ્ચે દરરોજ કોઈને કોઈ ટીવી સેલિબ્રિટી તેની ઝપેટમાં આવી રહ્યું છે. હવે ટીવી એક્ટર નિમિશ તનેજાનો આખો પરિવાર કોરોના સંક્રમણનો શિકાર બની ગયો છે. નમિશના માતા-પિતા અને બહેન ઉપરાંત તેનો કઝિન ભાઈ પણ કોરોના પોઝિટિવ નોંધાયો છે. જોકે, નમિશ તનેજાનો કોરોના રિપોર્ટ નેગેટિવ આવ્યો છે, જ્યારબાદ તેણે સાવધાનીના ભાગરૂપે પોતાને ભાઈના ઘરે ક્વૉરન્ટાઈન કરી લીધો છે.

અમારા સહયોગી ટાઈમ્સ ઑફ ઈન્ડિયા સાથે વાતચીતમાં નમિશ તનેજાએ કહ્યું કે, 'મેં 9 સપ્ટેમ્બર સુધી ટીવી શો 'એ મેરે હમસફર' માટે શૂટિંગ કર્યુ હતું. 10 સપ્ટેમ્બરે મારા પપ્પાની તબિયત થોડી ખરાબ થઈ તો ડૉક્ટરે તેમને કોરોનાની તપાસ કરાવવા માટે કહ્યું. તે સમયે પરિવારમાં તમામ લોકોએ કોરોના ટેસ્ટ કરાવ્યો. તેમાં મારા મમ્મી, બહેન અને કઝિન ભાઈના ટેસ્ટ કોરોના પોઝિટિવ આવ્યા. મારો રિપોર્ટ નેગેટિવ આવતા હું મારા ભાઈના એપાર્ટમેન્ટમાં છું અને થોડા દિવસ માટે પોતાને હવે અહીં ક્વૉરન્ટાઈન કરી લીધો છે.'

નમિશ તનેજાએ આગળ જણાવ્યું કે, તે તમામ નિયમોનું પાલન કરી રહ્યો છે અને બસ આશા રાખી રહ્યો છે કે, તેના પરિવારજનો ટૂંક સમયમાં સ્વસ્થ થઈ જાય. નમિશે ઈન્સ્ટાગ્રામ પર પણ એક પોસ્ટ દ્વારા પોતાનો કોરોના નેગેટિવ હોવાની જાણકારી આપી. તેણે લખ્યું હતું કે, 'વિશ્વાસ છે કે, તમે બધા એકદમ સ્વસ્થ હશો. તમને બધાને જણાવવા માગું છું કે, મારા પેરેન્ટ, બહેન અને કઝિન ભાઈ જે અમારી સાથે જ રહેતો હતો, તેમના કોરોના રિપોર્ટ પોઝિટિવ આવ્યા છે. મારો રિપોર્ટ નેગેટિવ આવ્યો છે અને હું હોમ આઈસોલેશનમાં છું અને કડકાઈથી તેને ફોલો કરી રહ્યો છું. હું એડવાન્સમાં તમારા પ્રેમ અને સપોર્ટનો આભાર માનવા માગું છું. પ્લીઝ સુરક્ષિત રહો. પોતાની અને પોતાના પરિવારજનોની સંભાળ રાખો.

ઉલ્લેખનીય છે કે, છેલ્લા થોડા સમયમાં ઘણા બધા ટીવી એક્ટર્સ કોરોનાની ઝપેટમાં આવી ગયા છે. થોડા દિવસ પહેલા ડાન્સ રિયાલિટી શો 'ઈન્ડિયાઝ બેસ્ટ ડાન્સર'ના સેટ પર 7 સભ્યો કોરોનાથી સંક્રમિત થયા હતા. ત્યારબાદ શોની જજ મલાઈકા અરોરાનો ટેસ્ટ પણ પોઝિટિવ આવ્યો હતો. હાલમાં તે પોતાના ઘરે ક્વૉરન્ટાઈન છે અને લોકો તેના સ્વસ્થ થવાની કામના કરી રહ્યા છે.