આવી ગઈ બિગ બોસ 14ના ગ્રાન્ડ પ્રીમિયરની તારીખ, સલમાને કહ્યું 'હવે સીન પલટાશે'

બિગ બોસના ક્રેઝી ફેન્સ કે જેઓ શોની 14મી સીઝનની આતુરતાથી રાહ જોઈ રહ્યા હતા તેનો અંત હવે આવી ગયો છે. સૌથી વધારે જોવાતો વિવાદાસ્પદ રિયાલિટી શો હાઈ-ડોઝ ડ્રામા સાથે ફરી એકવાર દર્શકોને મનોરંજન પીરસવા માટે તૈયાર છે. શોના મેકર્સે પ્રોમો લોન્ચ કર્યો છે, જેમાં હોસ્ટ સલમાન ખાન જોવા મળી રહ્યો છે. પ્રોમામાં શોના ગ્રાન્ડ પ્રીમિયરની તારીખ પણ જાહેર કરવામાં આવી છે. જે 3 ઓક્ટોબર, 2020 એટલે શનિવારે 9 વાગ્યે શરુ થશે.



વીડિયોમાં હોસ્ટ સલમાન ખાનના હાથ અને પગ સાંકળથી બાંધેલા જોવા મળી રહ્યા છે. તેણે મોં પર માસ્ક પણ પહેર્યું છે. વીડિયોમાં તે કહી રહ્યો છે કે, 'કંટાળો થશે ચકનાચૂર, ટેન્શન જતું રહેશે, સ્ટ્રેસનું વાગશે બેન્ડ, હવે સીન પલટાશે કારણ કે બિગ બોસ આપશે 2020ને જવાબ'. આ વીડિયોના કેપ્શનમાં લખવામાં આવ્યું છે કે, '2020ની દરેક સમસ્યાને ચકનાચૂર કરવા માટે આવી ગયું છે #BigBoss! #BB14 ગ્રાન્ડ પ્રીમિયર, 3 ઓક્ટોબર, શનિવારે રાત્રે 9 કલાકે'.

સીઝનના કન્ટેસ્ટન્ટની વાત કરીએ તો, નિયા શર્મા, વિવિયન ડિસેના નમિષ તનેજા, ઝૈન ઈમામ, આમિર અલી, આકાંક્ષા પુરીના નામની ચર્ચા થઈ રહી છે. જો કે, આ તમામે આ ન્યૂઝને અફવા ગણાવીને ફગાવી દીધા હતા.

બીજી તરફ, જાસ્મીન ભસીન, પવિત્રા પુણ્યા, રામાનંદ સાગરની પૌત્રી સાક્ષી ચોપરા, એજાઝ ખાન, નૈના સિંહ, પંજાબી એક્ટ્રેસ સારા ગુરપાલના નામ કન્ફર્મ થયા છે અને તેઓ બિગ બોસ 14ના ઘરમાં કેદ થશે તે નક્કી છે.

રિયાલિટી શો સપ્ટેમ્બર મહિનામાં જ ઓન એર થવાનો હતો. પરંતુ મહામારીના કારણે તેની લોન્ચ ડેટ એક મહિના પાછળ કરવામાં આવી છે. કન્ટેસ્ટન્ટને હાલ અલગ-અલગ હોટેલમાં ક્વોરન્ટિન કરવામાં આવ્યા છે. તેમનો કોવિડ ટેસ્ટ કર્યા બાદ જ તેમને બિગ બોસ 14ના ઘરમાં જવાની મંજૂરી આપવામાં આવશે.

સલમાન ખાન રિયાલિટી શોની સતત 11મી સીઝન હોસ્ટ કરતો જોવા મળશે. રિપોર્ટ્સ પ્રમાણે, આ શો હોસ્ટ કરવા માટે એક્ટરને 250 કરોડ રૂપિયાની ફી મળી છે. આ સાથે જ તે નાના પડદાનો હાઈએસ્ટ પેઈડ એક્ટર બની ગયો છે. ટેલિવિઝન ઈન્ડસ્ટ્રીમાં આજ સુધી કોઈ કલાકારને આટલી ફી ઓફર કરાઈ નથી. રિપોર્ટ્સમાં તેમ પણ કહેવામાં આવ્યું છે કે, સલમાન વીકમાં એકવાર જ શોનું શૂટિંગ કરશે, જેમાં બે એપિસોડ શૂટ થશે.