'બિગ બોસ 14'ની ટેલેન્ટ મેનેજર પિસ્તા ધાકડનું 24 વર્ષની વયે થયું મોત, હિમાંશી ખુરાના આઘાતમાં

શુક્રવારે એટલે કે તારીખ 15 જાન્યુઆરીએ 'બિગ બોસ 14'ના સેટની બહાર એક દુર્ઘટના ઘટી કે જેમાં શૉની ટેલેન્ટ મેનેજર પિસ્તા ધાકડનું મોત થયું છે. પિસ્તાની ઉંમર 24 વર્ષ હતી અને તેના અચાનક મૃત્યુના સમાચારથી આખી ટીમને આંચકો લાગ્યો છે. પિસ્તા ધાકડ 'બિગ બોસ'ને પ્રોડ્યુસ કરતી કંપની 'Endemol Shine India' સાથે જોડાયેલી હતી.

પિસ્તા ધાકડના મોતથી કામ્યા પંજાબી, હિમાંશી ખુરાના, યુવિકા ચૌધરી અને તે તમામ સેલેબ્સને આઘાત પહોંચ્યો છે કે જેઓ 'બિગ બોસ'નો ભાગ રહી ચૂક્યા છે અને પિસ્તા ધાકડને નજીકથી ઓળખતા હતા.

'બિગ બોસ 13'માં જોવા મળેલી હિમાંશી ખુરાનાએ પિસ્તા ધાકડનો સલમાન ખાન સાથેનો ફોટોગ્રાફ ઈન્સ્ટાગ્રામ પર શેર કરતા લખ્યું કે 'RIP પિસ્તા, ખરેખર જીવનનું કશું નક્કી નથી'.

જ્યારે કામ્યા પંજાબીએ પિસ્તા ધાકડની એક સેલ્ફી શેર કરતા ઈન્સ્ટાગ્રામ પર લખ્યું કે 'પિસ્તા ધાકડ માત્ર 23 વર્ષની હતી. તે છેલ્લા કેટલાંક વર્ષથી 'બિગ બોસ' સાથે જોડાયેલી હતી અને ખૂબ હોશિયાર છોકરી હતી. પણ, તેનું નિધન થઈ ગયું.

જ્યારે યુવિકા ચૌધરીએ ઈન્સ્ટાગ્રામ પર પિસ્તા ધાકડનો એક જૂનો વિડીયો શેર કર્યો અને લખ્યું કે 'તું અમને છોડીને આટલી જલદી કેમ જતી રહી, મને વિશ્વાસ નથી થઈ રહ્યો.'

'સ્પોટબોય'ના એક રિપોર્ટ મુજબ, શુક્રવારે 'બિગ બોસ 14'ના વીકેન્ડ વારનું શૂટ કર્યા બાદ પિસ્તા ધાકડ તેના એક અસિસ્ટન્ટની સાથે સ્કૂટી પર પરત ફરી રહી હતી. ત્યારે અંધારામાં તેનું સ્કૂટી સ્લિપ થઈ જતાં તેઓ પડી ગયા હતા. ત્યારે પાછળથી આવી રહેલી વેનિટી વાન અજાણતા જ પિસ્તા ધાકડ ઉપરથી નીકળી ગઈ હતી. રિપોર્ટ મુજબ, પિસ્તા ધાકડનું ઘટનાસ્થળે જ મોત નીપજ્યું હતું. તેણે 'બિગ બોસ' સિવાય 'ખતરો કે ખિલાડી'માં પણ કામ કર્યું હતું, તે કંપનીના ટોચના કર્મચારીઓ પૈકીની એક હતી.