રાહુલ વૈદ્ય સાથે બ્રેકઅપ કરી લેવાની મળી સલાહ, દિશા પરમારે આપ્યો જવાબ

બિગ બોસ 14ના ઘરની અંદર લડાઈ-ઝઘડા વધી ગયા છે. રાહુલ વૈદ્યનો ગુરુવારે રુબિના દિલૈક સાથે ખૂબ મોટો ઝઘડો થયો, તો શુક્રવારે તે એજાઝ ખાન સાથે બાખડી પડ્યો. આ વચ્ચે રાહુલ વૈદ્ય પોતાની ગર્લફ્રેન્ડ દિશા પરમારના કારણે ફરી એકવાક ચર્ચામાં છે. સોશિયલ મીડિયા ટ્રોલર્સે દિશાને સલાહ આપી કે તે રાહુલ વૈદ્ય સાથે બ્રેકઅપ કરી લે. દિશાએ આ ટ્રોલર્સને બરાબરનો જવાબ આપ્યો છે.


ટ્રોલર્સને જવાબ આપતાં દિશા પરમારે ટ્વીટ કરીને લખ્યું છે કે, 'એક સારી કહેવત છે...'જિસકે ખુદ કે ઘર શીશે કે હોતે હૈ...વો દુસરે પે પથ્થર નહીં ફેંકતે' તમે બધાના શુભચિંતક નથી. તેથી તમારા સૂચનો તમારી પાસે રાખો. હું મારા નિર્ણય જાતે લઈ શકું છું'.

ઉલ્લેખનીય છે કે, 11મી નવેમ્બરે દિશા પરમારના બર્થ ડે પર રાહુલ વૈદ્યએ બિગ બોસના ઘરમાં ઘૂંટણિયે બેસીને તેને લગ્ન માટે પ્રપોઝ કરી હતી. રાહુલે પોતાની સફેદ ટી-શર્ટ પર લિપસ્ટિકથી દિશાનું નામ અને હેપી બર્થ ડે લખ્યું હતું, જ્યારે ટી-શર્ટમાં પાછળની તરફ મારી સાથે લગ્ન કરીશ? તેવો સવાલ પૂછ્યો હતો.


બીજી તરફ રાહુલની મમ્મીએ આ રિલેશનશિપ પર મહોર મારી દીધી હતી. તેમણે કહ્યું હતું કે, 'હું તેના માટે ખુશ છું. તેણે આમ અચાનક પ્રપોઝ કરી દેતાં મને પણ આશ્ચર્ય થયું છે. પરંતુ મને ખુશી છે કે દિશા એ છોકરી છે જે તેને પસંદ આવી છે. દિશા ખૂબ પ્રેમાળ છોકરી છે અને મને ખૂબ ગમે છે. આનાથી વધુ હું કંઈ કહી નહીં શકું. તે પાછો આવશે પછી આ વિશે વધુ વાત થઈ શકશે. અમે પરિવારના સભ્યો બેસીને આ વિશે ચર્ચા કરીશું'.

જણાવી દઈએ કે, દિશાને નેશનલ ટેલિવિઝન પર પ્રપોઝ કરવાનો આઈડિયા રાહુલને બિગ બોસ 14ની કન્ટેસ્ટન્ટ અને એક્ટ્રેસ જાસ્મીન ભસીને આપ્યો હતો. ઉલ્લેખનીય છે કે, અગાઉ પણ રાહુલ અને દિશા એકબીજાને ડેટ કરતાં હોવાની ચર્ચા ઉઠી હતી પરંતુ આ વાત બંનેમાંથી એકેય સ્વીકારી નહોતી. બિગ બોસના ઘરમાં જતાં પહેલા રાહુલે દિશાને માત્ર સારી ફ્રેન્ડ ગણાવી હતી.