એકતા કપૂરે કરાવ્યો ફૂડ એલર્જી ટેસ્ટ, આ શાક ખાવાથી તકલીફ થતી હોવાનું બહાર આવ્યું

ટીવી ક્વીન અને જાણીતી પ્રોડ્યુસર એકતા કપૂરે હાલમાં જ એક ટેસ્ટ કરાવ્યો છે. જેના વિશે તેણે ફેન્સને જાણકારી આપી છે. એકતા કપૂરે ઈન્સ્ટાગ્રામ પર તસવીર શેર કરી છે. જેમાં તેના હાથ પર સોયના નિશાન જોઈ શકાય છે.

પેથોલોજી લેબમાં જઈને એકતા કપૂરે ફૂડ એલર્જી ટેસ્ટ કરાવ્યો હતો. જે બાદ રિપોર્ટ આવ્યો કે તેને ફ્લાવર/ફુલેવરની એલર્જી છે. ફ્લાવર/ફુલેવર એવું શાક છે જે લગભગ અઠવાડિયે એકવાર તો બધાના ઘરે બનતું જ હોય છે. આવા સૌથી કોમન શાકભાજીની એલર્જી સોપ ક્વિન એકતા કપૂરને છે.


એકતા કપૂરે ઈન્સ્ટાગ્રામ સ્ટોરીમાં તેના હાથની તસવીરો શેર કરી હતી. જેમાં લખ્યું હતું, 'ફૂડ એલર્જીનું ટેસ્ટિંગ...IBSની તકલીફ છે...જો કોઈ બીજાને પણ હોય તો આ ઉકેલ શોધવાનો સારો ઉપાય છે.' ઉલ્લેખનીય છે, IBS એટલે ઈરિટેબલ બોવેલ સિન્ડ્રોમ. જેમાં પેટમાં દુઃખાવો, પેટ ફુલી જવું, ગેસ, ઝાડા અથવા કબજિયાત વગેરે જેવી સમસ્યા થાય છે. આ લાંબાગાળા સુધી રહેતી બીમારી છે.

જણાવી દઈએ કે, હાલમાં જ એકતા કપૂરના ઘરે ગણપતિ વિસર્જન થયું હતું. જેમાં ટીવી ઈન્ડસ્ટ્રીના તેના મિત્રો હાજર રહ્યા હતા. આ સિવાય એકતા કપૂર સુપરનેચરલ શો 'નાગિન 5'ના લીધે પણ ચર્ચામાં છે. આ શોમાં સુરભી ચાંદના, મોહિત સેહગલ અને શરદ મલ્હોત્રા લીડ રોલમાં છે.