આવતા મહિને ગૌહર-ઝૈદ કરશે લગ્ન? પિતા ઈસ્માઈલે કહ્યું 'અમે તૈયાર છીએ'

રિપોર્ટ્સ પ્રમાણે, ગૌહર ખાન અને તેના બોયફ્રેન્ડ ઝૈદ દરબારે આવતા મહિને લગ્ન કરવાનો નિર્ણય લીધો છે. ચર્ચા તેવી પણ છે કે તેઓ મુંબઈમાં લગ્ન કરશે. જ્યારે આ અંગે ઝૈદના પિતા અને મ્યૂઝિક ડિરેક્ટર ઈસ્માઈલ દરબારનો સંપર્ક કરવામાં આવ્યો તો તેમણે ETimes TV સાથે વાતચીત કરતાં કહ્યું કે, તેનો દીકરો હાલમાં જ ગૌહરને તેને તેમજ તેની પત્ની આયેશાને મળાવવા માટે લઈને આવ્યો હતો. ગૌહર ખાન બિગ બોસ 14ના ઘરમાં ગઈ તે પહેલા ઈસ્માઈલના ઘરે મીટિંગ થઈ હતી.

ઈસ્માઈલે કહ્યું કે, 'ગૌહર અમારી સાથે 4 કલાક રહી હતી. અમે સાથે બેસીને ડિનરમાં બિરયાની ખાધી. જો વાઈબ્સ સારા ન હોય તો મને નથી લાગતું કે આજના સમયમાં કોઈ 4 મિનિટ પણ બેસી શકે. મારાા દીકરા ઝૈદે મને કહ્યું કે, તેઓ એકબીજાને લઈને ગંભીર છે. મને તેમા કોઈ વાંધો નથી. પિતા તરીકે, મેં તેને કહ્યું કે, તે તારા કરતાં 5 વર્ષ મોટી છે તેથી લગ્ન કરતા પહેલા ખાતરી કરી લો કે આ પ્રેમ જ છે. મારો દીકરો મને નિશ્ચિત લાગે છે. અને જ્યારથી અમે ગૌહરને મળ્યા છીએ ત્યારથી મને પણ ખાતરી થઈ ગઈ છે કે તે મારા દીકરાનું ધ્યાન રાખશે. આ સિવાય મારી પત્નીને પણ ગૌહર ગમી છે'.

આયેશા ઝૈદની સાવકી માતા છે. તેણે કહ્યું કે, 'ઝૈદના નિર્ણયમાં અમે ખુશ છીએ. તેણે મારી અને તેની માતા વચ્ચે ભેદભાવ રાખ્યો નથી. ગૌહર પ્રેમાળ છોકરી છે. તેઓ તેમના જીવનમાં શુ કરવા માગે છે તે અંગેનો નિર્ણય તેમના પર છોડ્યો છે'.

ઈસ્માઈલે તેમ પણ કહ્યું કે, 'બિગ બોસ 14ના ઘરમાં જતા પહેલા ગૌહરે મને ફોન કર્યો હતો અને આશીર્વાદ માગ્યા હતા. મારા આશીર્વાદ હંમેશા તેની સાથે છે. તેણે મને તેમ પણ કહ્યું કે, જો હું તેની માતાને મળીશ તો તેને ખુશી થશે'. તેથી ટૂંક સમયમાં ઈસ્માઈલ અને આયેશા ગૌહરની મમ્મીને મળવા જવાના છે. પરંતુ લગ્નની તારીખ વિશે શું? કારણ કે રિપોર્ટ્સ પ્રમાણે ગૌહર અને ઝૈદ નવેમ્બર અથવા ડિસેમ્બરમાં પતિ-પત્ની બનવા માગે છે. આ અંગે આયેશાએ કહ્યું કે, 'જેમ ઈસ્માઈલે કહ્યું તેમ હજુ અમે તારીખ નક્કી કરી નથી. પરંતુ જો ઝૈદ અને ઈસ્માઈલ કાલે અથવા છ મહિના પછી અથવા આજે કહેશે તો પણ અમે તૈયાર છીએ. તેમની ખુશીમાં જ અમારી ખુશી છે'.