ડ્રગ્સ કેસમાં જેલથી બહાર આવ્યા બાદ આદિત્ય નારાયણના રિસેપ્શનમાં પહોંચ્યા હર્ષ-ભારતી

જાણીતી કોમેડિયન ભારતી સિંહ અને તેના પતિ હર્ષ લિંબાચિયાનું નામ હાલમાં જ ડ્રગ્સ કેસમાં સામે આવ્યું હતું. હવે બંને સિંગર અને હોસ્ટ આદિત્ય નારાયણના વેડિંગ રિસેપ્શનમાં જોવા મળ્યા છે. સોશિયલ મીડિયા પર વિડીયો વાઈરલ થઈ રહ્યો છે, જેમાં ભારતી સિંહ અને હર્ષ લિંબાચિયા આદિત્યના રિસેપ્શનમાં મસ્તી કરતા દેખાઈ રહ્યા છે.

જણાવી દઈએ કે હાલમાં જ ભારતી સિંહ અને હર્ષ લિંબાચિયાની ડ્રગ્સ કેસમાં ધરપકડ કરવામાં આવી હતી. એનસીબીની રેડમાં તેના ઘર અને ઓફિસેથી ગાંજો મળી આવ્યો હતો. આ મામલે પૂછપરછ કરવા માટે નાર્કોટિક્સ કન્ટ્રોલ બ્યૂરોએ ભારતી અને હર્ષને અરેસ્ટ પણ કર્યા હતા. જોકે બાદમાં બંનેને જલ્દી જ જામીન મળી ગયા હતા. હવે તેમના સામે આવેલા વિડીયોમાં ભારતી વ્હાઈટ ગાઉનમાં જ્યારે હર્ષ બ્લૂ કોર્ટમાં દેખાઈ રહ્યો છે. બંને સાથે સેલ્ફી લેવા માટે પણ ફેન્સ પડાપડી કરતા વિડીયોમાં દેખાઈ રહ્યા છે.


ઉલ્લેખનીય છે કે સિંગર આદિત્ય નારાયણના 1લી ડિસેમ્બરે ફિઆન્સે શ્વેતા અગ્રવાલ સાથે મંદિરમાં લગ્ન કર્યા. શ્વેતા સાથે સાત ફેરા લીધા બાદ આદિત્ય ખૂબ જ ખુશ છે. તેનું કહેવું છે કે શ્વેતા સાથે લગ્ન કરવાનું સપનું સાચું થઈ ગયું. આદિત્યએ લગ્ન પહેલા શ્વેતાને 11 વર્ષ સુધી ડેટ કરી હતી.

હાલમાં જ બોમ્બે ટાઈમ્સ સાથે વાતચીતમાં આદિત્યએ જણાવ્યું હતું કે, શ્વેતા અને હું પરિણીત છીએ આ સપના જેવું અનુભવાય છે. આ એક સપના જેવું છે, જે સાચું થઈ ગયું છે. હું શ્વેતા સિવાય કોઈ અન્ય સાથે પોતાની જિંદગી પસાર કરવાનું વિચારી પણ નથી શકતો. તેણે મને એક સારો વ્યક્તિ બનવામાં મદદ કરી છે. શ્વેતા તે વ્યક્તિ છે જેની સાથે હું તે છું જે હું છું.