હિના ખાનના ડાબા હાથમાં પહોંચી ઈજા, પીડા સહન ન થતાં બગાડ્યું મોં

પોતાની તસવીરો અને વીડિયોથી સોશિયલ મીડિયા પર સતત એક્ટિવ રહેતી હિના ખાનના ફેન્સ માટે ખરાબ સમાચાર છે. એક્ટ્રેસના હાથમાં ડાબા હાથમાં ઈજા પહોંચી છે અને આ વાતની જાણકારી તેણે ઈન્સ્ટાગ્રામ સ્ટોરીમાં એક બૂમરેંગ વીડિયો શેર કરીને આપી છે. જેમાં તેના હાથમાં ગરમ પાટો બાંધ્યો છે અને પીડાના કારણે તે મોં બગાડી રહી છે. વીડિયોની સાથે તેણે લખ્યું છે કે, 'કારણ કે આ 2020 છે'.


વર્ષ 2020ના મોટાભાગના મહિના જીવલેણ કોરોના વાયરસના કારણે લોકડાઉનમાં જ પસાર થઈ ગયા. મહામારીએ દરેકને બિનજરૂરી કામ વગર ઘરમાં રહેવા અને સાવચેતી રાખવા માટે મજબૂર કર્યા છે. આ દરમિયાન ઘરમાં રહીને કંટાળી ગયેલા લોકોને એક્ટર્સ સતત પોતાના ટેલેન્ટથી મનોરંજન પૂરુ પાડી રહ્યા છે. જેમાં હિના ખાનનો પણ સમાવેશ થાય છે. લોકડાઉનની શરુઆતમાં તેણે ઈન્સ્ટાગ્રામ પર પોતાના ઘણા ફની વીડિયો શેર કર્યા હતા. જે જોઈને ફેન્સના ચહેરા પર હાસ્ય આવ્યું હતું. સ્કેચિંગ, હેર સ્ટાઈલિંગ, કૂકિંગ, કપડા ધોવા, ફિટનેસ ટિપ્સ આપવાથી લઈને દરેક વસ્તુ કેવી રીતે સેનિટાઈઝ કરવી, માસ્ક કેવી રીતે પહેરવું તે અંગેનું જ્ઞાન એક્ટ્રેસે આપ્યું હતું.


એક્ટ્રેસ આ મહિનાની શરુઆતમાં બોયફ્રેન્ડ રોકી જયસ્વાલ અને પરિવાર સાથે માલદીવ્સના વેકેશન પર ગઈ હતી. ત્યાંથી પણ તે પોતાની સુંદર ટ્રિપની તસવીરો ફેન્સ સાથે શેર કરતી હતી. તેણે આજે પણ આઈસલેન્ડ ટ્રિપમાંથી કેટલીક તસવીરો ઈન્સ્ટાગ્રામ પર શેર કરી છે.


હિના ખાનની વાત કરીએ તો, તેની જર્નીની શરુઆત 'યે રિશ્તા ક્યા કહેલાતા હૈ'થી થઈ હતી. જેમાં તેણે આઠ વર્ષ સુધી 'અક્ષરા'નો રોલ પ્લે કર્યો હતો. જે એક સીધી-સાદી અને સરળ વહુ હતી. વિવાદાસ્પદ રિયાલિટી શો બિગ બોસની 11મી સીઝનમાં ભાગ લેવા માટે તેણે 'યે રિશ્તા...' શોને અલવિદા કહ્યું હતું. બાદમાં તે 'કસૌટી જિંદગી કી 2'માં 'કોમોલિકા'ના રોલમાં જોવા મળી હતી. આ શોને પણ તેણે અધવચ્ચેથી છોડી દીધો હતો કારણ કે તેને બોલિવુડ પ્રોજેક્ટ પૂરા કરવાના હતા. ગયા વર્ષે તેણે કાન ફિલ્મ ફેસ્ટિવસલના રેડ કાર્પેટ પર ડેબ્યૂ કર્યું હતું અને ન્યૂઝમાં છવાઈ ગઈ હતી. હિના ખાન છેલ્લે એકતા કપૂરના સુપર નેચરલ શો 'નાગિન 5'ના પ્રીમિયર એપિસોડમાં જોવા મળી હતી. જેમાં તેણે 'આદી નાગિન'ની ભૂમિકા ભજવી હતી.