DDLJનો 'રાજ' બન્યો આદિત્ય નારાયણ, પત્ની શ્વેતા માટે ગાયું 'પહેલા નશા' સોન્ગ

સિંગિંગ રિયાલિટી શો 'ઈન્ડિયન આઈડલ 12'નો અપકમિંગ એપિસોડ 'ફેમિલી સ્પેશિયલ' છે. જેમાં આદિત્ય નારાયણની પત્ની શ્વેતા અગ્રવાલ, પિતા ઉદિત નારાયણ અને માતા દીપા મહેમાન બનીને આવવાના છે. લગ્ન બાદ શ્વેતા પહેલીવાર આદિત્ય સાથે દેખાવાની છે ત્યારે ફેન્સ તેમને જોવા માટે અતિ ઉત્સાહિત છે. શોમાં તેની એન્ટ્રી પણ ધમાકેદાર રીતે થવાની છે. શોનો પ્રોમો સામે આવ્યો છે. જેમાં જોઈ શકાય છે કે, શ્વેતાની એન્ટ્રી થતાં 'તુજકો બનાકર કે લે જાયેંગે આદી કી દુલ્હનિયા' વાગવા લાગે છે. જે બાદ આદિત્ય શ્વેતાને ઊંચકીને સ્ટેજ પર લાવે છે.


પ્રોમોમાં આ સિવાય, એક કન્ટેસ્ટન્ટ શાહરુખ ખાન અને કાજોલની સુપર ડુપર હિટ ફિલ્મ 'દિલવાલે દુલ્હનિયા લે જાયેંગે'નું 'હો ગયા હૈ તુજકો તો પ્યાર સજના' ગાઈ રહી છે. આ સોન્ગ પર આદિત્ય ફિલ્મમાં શાહરુખે પહેરેલી કેપ પહેરીને હાથમાં ગિટાર લઈને તેને વગાડે છે. તો શ્વેતા પણ ખુશ થઈને તેને ફ્લાઈંગ કિસ આપે છે.

આ સિવાય ઉદિત નારાયણ દીકરા અને વહુ માટે આમિર ખાનની ફિલ્મનું 'પહેલા નશા' સોન્ગ ગાય છે. જેના પર પર્ફોર્મન્સ આપતાં આદિત્ય અને શ્વેતા કપલ ડાન્સ કરે છે અને બાદમાં તેઓ એકબીજાને હગ કરે છે. બંનેને સાથે જોઈને શોના જજ પણ ખુશ થઈ જાય છે.


અગાઉ સેટ પરથી, શ્વેતા અગ્રવાલની કેટલીક તસવીરો સામે આવી હતી. જેમાં જોઈ શકાય છે કે, શ્વેતાએ સ્ટ્રેપી આઇવરી ગાઉન પહેર્યું છે તેમજ વાળને બાંધીને રાખ્યા છે. આદિત્યએ રેડ અને બ્લેક કલરનું એમ્બ્રોઈડરી કરેલું સૂટ પેન્ટ પહેર્યું છે.

આદિત્ય અને શ્વેતાની વાત કરીએ તો, તેમણે ગયા વર્ષે પહેલી ડિસેમ્બરે જૂહુમાં આવેલા એક મંદિરમાં લગ્ન કર્યા હતા. જેમાં માત્ર નજીકના સંબંધીઓ અને મિત્રોને આમંત્રિત કરાયા હતા. જે બાદ બીજી ડિસેમ્બરે તેમણે ભવ્ય રિસેપ્શન યોજ્યું હતું. લગ્ન બાદ બંને હનીમૂન માટે કાશ્મીર ગયા હતા. જ્યાં આદિત્ય સતત તસવીરો શેર કરતો હતો. આદિત્ય અને શ્વેતાએ 10 વર્ષ સુધી રિલેશનશિપમાં રહ્યા બાદ લગ્ન કરવાનો નિર્ણય લીધો હતો. બંનેની મુલાકાત તેમની ડેબ્યૂ ફિલ્મ 'શાપિત'ના સેટ પર થઈ હતી અને બાદમાં તેમની વચ્ચે પ્રેમ પાંગર્યો હતો. પહેલી જાન્યુઆરીએ બંનેના લગ્નને એક મહિનો પૂરો થતાં તેમણે એક રેસ્ટોરાંમાં જઈને તેનું સેલિબ્રેશન કર્યું હતું.