કન્ફર્મ! ટીવીની આ બે હીરોઈનો સલમાનના શો 'બિગ બોસ 14'માં લેશે ભાગ

ગત સીઝનને જબરદસ્ત ટીઆરપી મળ્યા બાદ ટીવી પરના સૌથી વિવાદાસ્પદ રિયાલિટી શો 'બિગ બોસ'ના મેકર્સ તેની 14મી સીઝન લઈને આવી રહ્યા છે. અમારા સહયોગી ETimes TVને જાણવા મળ્યું છે કે, ટીવી એક્ટ્રેસ જાસ્મીન ભસીને શો સાઈન કર્યો છે, જે સપ્ટેમ્બરમાં શરુ થવાની શક્યતા છે. જાસ્મીન આ પહેલા દિલ સે દિલ તક અને દિલ તો હૈપ્પી હૈ જી તેમજ ખતરો કે ખિલાડી જેવા શો કરી ચૂકી છે.

રસપ્રદ વાત એ છે કે, એક્ટ્રેસના 'દિલ સે દિલ તક' કો-સ્ટાર સિદ્ધાર્થ શુક્લાએ બિગ બોસ 13માં ભાગ લીધો હતો અને વિનર બન્યો હતો. 13મી સીઝન દરમિયાન જાસ્મીન બિગ બોસના ઘરમાં એક ટાસ્ક દરમિયાન ગેસ્ટ બનીને ગઈ હતી. આ દરમિયાન સિદ્ધાર્થ શુક્લા સાથે તેનું સારું બોન્ડિંગ જોવા મળ્યું હતું. જે બાદથી તે આગામી સીઝનમાં ભાગ લેવાની હોવાના સમાચાર વહેતા થયા હતા.

હાલ 'બાલવીર'માં જોવા મળેલી એક્ટ્રેસ પવિત્ર પુણ્યાએ પણ રિયાલિટી શો સાઈન કર્યો છે. રસપ્રદ વાત એ છે કે, તેનો એક્સ-બોયફ્રેન્ડ પારસ છાબડા બિગ બોસ 13નો કન્ટેસ્ટન્ટ હતો.

શો સાથે જોડાયેલા સૂત્રોએ માહિતી આપી હતી કે, 'એક્ટિંગ સિવાય જાસ્મીને પોતાની પર્સનાલિટીથી 'ખતરો કે ખિલાડી'ના દર્શકોને મનોરંજન પૂરુ પાડ્યું હતું. તેણે શોની ઓફરને સ્વીકારી તે વાતની મેકર્સને ખુશી છે. આ સીઝન માટે અમે પવિત્રા પુણ્યાને પણ સાઈન કરી છે. જો કે, કેટલીક ઔપચારિકતા બાકી છે. દરેક કન્ટેસ્ટન્ટ્સનો કોવિડ-19 ટેસ્ટ કરવામાં આવશે. આવતા મહિના શો શરૂ કરવાની યોજના છે'.

'બાલ વીર'ના સૂત્રોએ જણાવ્યું કે, 'બાલ વીરમાં પવિત્રાના ટ્રેકને એક મહિના સુધી હોલ્ડ પર મૂકવાની યોજના હતી. જો કે, તેણે આ સીરિયલમાંથી અનિશ્ચિત સમયગાળાની રજા લીધી છે. 31 ઓગસ્ટે તે પોતાનો છેલ્લો એપિસોડ શૂટ કરશે. બિગ બોસ માટે જ તેણે શોમાંથી રજા લીધી હશે તેવું અમારું માનવું છે'.

'નાગિન 4'માં રોલ પ્લે કરનાર નિયા શર્માને પણ બિગ બોસ 14ની ઓફર મળી છે. જો કે, તેણે શો સાઈન કર્યો કે કેમ તે અંગે હજુ કોઈ માહિતી મળી નથી. આ સિવાય ટીવી એક્ટર વિવિયન ડિસેના શોમાં ભાગ લેવાનો હોવાની ચર્ચા છે.

'ખતરો કે ખિલાડી- મેડ ઈન ઈન્ડિયા' પૂરુ થયા બાદ બિગ બોસ 14ની શરુઆત થશે તેમ લાગી રહ્યું છે. આ સિવાય બિગ બોસ 14 માટે જેમને અપ્રોચ કરવામાં આવ્યા છેતેમાં અર્જુન બિજલાની અને નૈના સિંહના નામનો સમાવેશ થાય છે. નૈનાનું નામ લગભગ નક્કી છે. જ્યારે અર્જુન આ બાબતે વિચારી રહ્યો છે.