કરણ પટેલે 'રાજકુમારી' મેહરના બર્થ ડે પર યોજી પાર્ટી, ફૂલ અને ફુગ્ગાથી ડેકોરેટ કરાયું ઘર

'યે હૈ મહોબ્બતે' ફેમ કરણ પટેલ અને અંકિતા ભાર્ગવની દીકરી મેહર એક વર્ષની થઈ ગઈ છે. 14મી ડિસેમ્બરે મેહરના બર્થ ડે પર મમ્મી-પપ્પાએ તેના માટે એક નાનકડી બર્થ ડે પાર્ટી યોજી હતી. જેની ઝલક કપલના સોશિયલ મીડિયા અકાઉન્ટ પર જોવા મળી રહી છે.


કલર કો-ઓર્ડિનેટેડ આઉટફિડ્સમાં ત્રણેય અદ્દભુત લાગી રહ્યા હતા. કરણે ઈન્સ્ટાગ્રામ પર તસવીર શેર કરીને લખ્યું છે કે, 'અમારી રાજકુમારી, અમારી જીવનદોરી, અમારી #RabDiMehr એક વર્ષની થઈ ગઈ છે. અમને મેહર આપીને આશીર્વાદ વરસાવવા બદલ ભગવાન તમારો આભાર. અમને તારા માતા-પિતા તરીકે પસંદ કરવા માટે મેહર તારો આભાર. મારા માટે પ્રેમનો અર્થ એકદમ બદલાઈ ગયો છે અને હવે તે તું છે મારી નાનકડી દીકરી. #DaddysDaughter #DaughtersAreTheBest #HappyOneYearMehr'.


કપલની દીકરી ભલે એક વર્ષની થઈ ગઈ હોય પરંતુ બંનેમાંથી એકેય હજુ સુધી તેનો ચહેરો ફેન્સને દેખાડ્યો નથી. મેહરના બર્થ ડે પર આખી જગ્યાને ફૂલ, ફુગ્ગાથી ડેકોરેટ કરવામાં આવ્યું હતું. આ સિવાય મેહર માટે એનિમલ થીમ પર બનેલી ટુ-ટાયર કેક પણ લાવવામાં આવી હતી.


અંકિતા ભાર્ગવે મેહર સફેદ ફ્રોકમાં બેઠી હોય તેવી તસવીર શેર કરી છે. આ સાથે તેણે એક નાનકડી નોટ પણ લખી છે. જેમાં તેણે લખ્યું છે કે, 'મારી ચિડીયા. મને તારી મમ્મી તરીકે પસંદ કરવા બદલ આભાર. મારાથી શક્ય હશે એટલું હું કરીશ. આવનારા તમામ જન્મમાં ભગવાન તને મારી દીકરી બનાવે તેવી હું પ્રાર્થના કરું છું. મારા શરીરનો દરેક રક્તકણ તને ખૂબ પ્રેમ કરે છે. તું તારા સુધી પહોંચજે અને તારું પોતાનું નક્ષત્ર બનાવજે. માય લવ. ભગવાન તને ખૂબ આશીર્વાદ આપે'.


અંકિતાએ અન્ય એક તસવીર પણ શેર કરી છે. જેમાં કરણ અને તે સાથે બેઠા છે અને મેહરને તેમની પાસે બોલાવી રહ્યા છે.


ઉલ્લેખનીય છે કે, કરણ પટેલે પત્નીની પ્રેગ્નેન્સીની વાત લાંબા સમય સુધી છુપાવીને રાખી હતી. નવેમ્બરમાં પોતાના બર્થ ડે પર કરણે અંકિતાની પ્રેગ્નેન્સીની વાત કન્ફર્મ કરી હતી. દીકરીના જન્મ પહેલા 2018માં અંકિતાનું મિસકેરેજ થયું હતું. કરણે 2015ના મે મહિનામાં એક્ટ્રેસ અંકિતા ભાર્ગવ સાથે લગ્ન કર્યા હતા.