KBCના કન્ટેસ્ટન્ટે બિગ બીને જણાવી વ્યથા, લોકડાઉને બધું ચોપટ કરી નાખ્યું

KBCના 14 ઓક્ટોબરના એપિસોડમાં કન્ટેસ્ટન્ટ હતા મુંબઈના સ્વપ્નિલ રમેશ ચૌહાણ. ગેમ શરુ કરતા પહેલા સ્વપ્નિલે લોકડાઉનમાં કઈ રીતે પોતાનો ધંધો ચોપટ થઈ ગયો તેની વાત કરી હતી. બિગ બી સાથે વાત કરતા તેમણે જણાવ્યું હતું કે પોતે સારી નોકરી છોડીને બિઝનેસ શરુ કર્યો હતો. જોબમાં તેમને ન માત્ર છ આંકડામાં સેલેરી, પરંતુ એક સારું ઘર પણ મળ્યું હતું.

સ્વપ્નિલે જણાવ્યું હતું કે, નોકરી છોડી ત્યારે માતા ખૂબ જ અપસેટ થઈ ગઈ હતી. તેમને આ નિર્ણય જરાય પસંદ નહોતો આવ્યો. જોકે, તે વખતે પત્નીએ ભરપૂર સાથ આપ્યો, અને બિઝનેસમાં મદદ કરી હતી. 2015માં તેમણે બિઝનેસ શરુ કર્યો હતો, પરંતુ લોકડાઉમાં ભારે નુક્સાન સહન કરવાનો વારો આવ્યો હતો. લોકડાઉન લાગુ પડ્યું તે પહેલા તેમના હાથમાં 12 પ્રોજેક્ટ હતા, પરંતુ અત્યારે તેમની પાસે કોઈ કામ નથી.

સ્વપ્નીલની કંપનીમાં એક સમયે 28 લોકો કામ કરતા હતા. જોકે, કંપની પાસે કોઈ કામ જ ના રહેતા આ તમામ કર્મચારીઓને વગર પગારે રજા પર જવા કે પછી નવી નોકરી શોધી લેવા માટે જણાવવાની ફરજ પડી હતી.

બિગ બીએ સ્વપ્નીલ સાથે ગેમ શરુ કરી હતી, અને તેમને ખાસ્સા પ્રભાવિત પણ કર્યા હતા. તેઓ 25 લાખ રુપિયા જીતીને ઘરે ગયા હતા. 50 લાખ રુપિયાનો સવાલ પૂછવામાં આવ્યો ત્યારે તેમણે તેનો જવાબ ના આપવાનું પસંદ કરી ગેમ છોડી દીધી હતી. ગેમ ચાલુ હતી તે દરમિયાન અમિતાભ બચ્ચને સ્વપ્નીલ ચૌહાણની ફેમિલી, બાળકો અને માતા સાથે વિડીયો કોલથી વાત કરી હતી.

ત્યારબાદના કન્ટેસ્ટન્ટ હતા હિમાચલ પ્રદેશથી આશીષ શર્મા. તેમણે જણાવ્યું હતું કે, તેમની માતા તેમને હોટ સીટ પર જોવા માગતી હતી. મજાક કરતા તેમણે એવું પણ કહ્યું હતું કે લોકડાઉનમાં માતાપિતા સાથે જ હતા, અને તે દરમિયાન માતાએ કેબીસી માટે ટ્રેનિંગ પણ આપી હતી. એટલું જ નહીં, માતાએ રામાયણ અને મહાભારત જોવાની પણ ફરજ પાડી હતી, જેથી કેબીસીના સવાલોના જવાબ આપી શકાય.