'કહાની ઘર ઘર કી'ની એક્ટ્રેસ પર શખ્સે કરી અશ્લીલ કોમેન્ટ, ભણાવ્યો બરાબરનો પાઠ

કહાની ઘર ઘર કી, થપકી પ્યાર કી અને વો રહેને વાલી મહેલો કી જેવા ટીવી શોમાં કામ કરી ચૂકેલી સ્મિતા સિંહને હાલમાં કડવો અનુભવ થયો હતો. પરંતુ, તે ખૂણામાં બેસીને રડી લે કે પછી ચૂપચાપ જે થાય તે જોયા કરે તેમાંથી એક નથી. વાત એમ છે કે, સ્મિતા સિંહ તેની બહેનપણીઓ સાથે બેસીને મસ્તી કરી રહી હતી ત્યારે જ એક શખ્સ તેની પાસે આવ્યો હતો અને અશ્લીલ કોમેન્ટ કરી હતી. શખ્સે જે રીતે કોમેન્ટ કરી, તે જ અંદાજમાં એક્ટ્રેસે તેને જવાબ આપ્યો હતો. આ ઘટના બાદ, સ્મિતાએ પોતાને થયેલા અનુભવને સોશિયલ મીડિયા હેન્ડલ પર શેર કર્યો હતો.

અમારા સહયોગી ટાઈમ્સ ઓફ ઈન્ડિયા સાથે વાતચીત કરતાં, સ્મિતા સિંહે કહ્યું કે, 'હું પ્લઝ સાઈઝ મહિલા છું. એક શખ્સ મારી પાસે આવ્યો અને મારા બોડી પાર્ટ્સ પર અશ્લીલ કોમેન્ટ કરી. મેં તેને વળતો જવાબ આપતા કહ્યું કે, જો મહિલા પર પુરુષો માટે આવી જ ભાષા વાપરવાનું શરુ કરી દેશે તો તમે તમારી સેલ્ફ રિસ્પેક્ટને ક્યાં છુપાવશો તેની તમને જાણ પણ નહીં થાય. હું આવી હરકતો કરનારા પુરુષોને ચેતવણી આપવા માગુ છું કે, જો હવે કોઈ આવું ફરીથી કરશો તો હું માત્ર તેનો વીડિયો જ નહીં બનાવું. પરંતુ નામ પણ લઈશ અને દુનિયાની સામે તે જાહેર પણ કરીશ. તેથી ચેતતા રહેજો'.


સ્મિતા એક વર્ષની હતી ત્યારથી એક્ટિંગ કરે છે. તેણે કહ્યું કે, જ્યારે તે નાની હતી, ત્યારે ઘણી અન્ય મહિલાઓની જેમ તે પણ આવા પુરુષોનો અવારનવાર સામનો કરતી હતી. 'તે સમયે હું ડરતી હતી, શરમ અનુભવતી હતી અને હતાશ થઈ જતી હતી. પરંતુ જેમ-જેમ મોટી થતી ગઈ તેમ-તેમ આવા લોકોને જવાબ કેવી રીતે આપવો તે શીખી ગઈ. તેમને એવું લાગે છે કે, મહિલાઓ નોનસેન્સ સાંભળી લેશે અને ચૂપ રહેશે. તેઓ મોર્ડન મહિલાઓનો સામનો કરી રહ્યા છે, જેઓ આવી સતામણીથી ડરી જાય તેવી નથી', તેમ સ્મિતાએ કહ્યું.

તેણે ઉમેર્યું કે, 'છોકરીઓએ તે જ ક્ષણે પોતાનો અવાજ ઉઠાવવો જોઈએ અને તેનો વીડિયો બનાવીને તેને ફેમસ કરી દેવો જોઈએ. જેથી, તે શરમ અનુભવે અને આ બંધ કરે. વર્ક પ્લેસ પર આવા કિસ્સા બને તો મહિલાઓ ડરી જાય છે અને ચૂપ રહે છે. જે પુરુષોને વધારે હિંમત આપે છે'.

સ્મિતાએ કહ્યું કે, તે એમાંથી એક નથી જે ડરી જાય અને પીડિતા હોવાનું અનુભવે. 'મારું સેન્સ ઓફ હ્યુમર સારું છે અને આવા પુરુષોને થપ્પડ કેવી રીતે મારવી તે પણ જાણું છું. મેં પણ આ જ કર્યું'.