બહેન ગૌહરના લગ્ન યાદગાર બને માટે નિગારે કરી હતી મહેનત, કહ્યું 'એવોર્ડ મળવો જોઈએ'

ગૌહર ખાનને મનગમતો જીવનસાથી મળી ગયો તે વાતથી સૌથી વધારે ખુશ તેની મોટી બહેન નિગાર ખાન છે. જે લગ્નના થોડા દિવસ પહેલા અમેરિકાથી મુંબઈ આવી હતી. આશરે એક વર્ષ બાદ પિયરના લોકો સાથે મુલાકાત થતાં તે તેમની સાથે ક્લોવિટી ટાઈમ સ્પેન્ડ કરી રહી છે. આ દરમિયાન તેણે ઈન્સ્ટાગ્રામ પર નવદંપતીની બે તસવીરો શેર કરીને તેમના પર પ્રેમ વરસાવ્યો છે.


નિગાર ખાને લગ્ન અને રિસેપ્શનની સુંદર તસવીરો શેર કરી છે અને લખ્યું છે કે, 'અને તેમણે કહ્યું ''કુબૂલ હૈ, કુબૂલ હૈ, કુબૂલ હૈ'' અને ખુશીથી બૂમો પાડી ''મુબારક હો!!!!!''. આ બંને પ્રેમાળ લોકોને ખૂબ બધી દુઆ, કે જેઓ હવે એક થઈ ગયા છે. અલ્લાહ હંમેશા તમારા બંને પર આશીર્વાદ વરસાવતા રહે'.

નિગારની પોસ્ટ પર ઝૈદે આભાર માનતાં લખ્યું છે કે, 'આભાર નિક્સ. તું દરેક બાબતમાં બેસ્ટ છે. અલ્લાહ તને હંમેશા ખુશ રાખે'. તો ગૌહરે લખ્યું છે કે, 'દરેક બાબત માટે તારો આભાર નિક્સ. જે રીતે ઝેક્સે કહ્યું તેમ, આધી પસલી સબસે બડી જાન. મારી ઓલ ઈન વન. લવ યુ સો મચ'.


ગૌહરના લગ્નને દરેક રીતે યોગ્ય બનાવવા માટે નિગાર ખાને ખૂબ મહેનત કરી હતી તેમ લાગી રહ્યું છે. કારણ કે ખાન સિસ્ટર્સની બેસ્ટ ફ્રેન્ડ પ્રીતિ સિમોસે ઈન્સ્ટાગ્રામ પોસ્ટમાં નિગારના ખૂબ વખાણ કર્યા છે. તેણે નિગાર સાથેની કેટલીક તસવીરો શેર કરીને લખ્યું છે કે, 'આ એક એવી મહિલા માટે સ્પેશિયલ પોસ્ટ છે જેની તાકાત અને પ્રેમને બિરદાવવાની જરૂર છે. ગૌહર ખાન અને ઝૈદ દરબારની સપોર્ટ સિસ્ટમ, આયોજન...સ્વાગત...સંભાળ...ગૌહરની સૌથી ખાસ ક્ષણોને સુંદર યાદ બનાવનારી. મને નથી લાગતું કે નિગાર તારા વગર આટલા અદ્દભુત રીતે લગ્ન થઈ શક્યા હોત. તું જ્યારથી અહીંયા આવી ત્યારથી તે બધુ સંભાળી લીધુ હતું. હું તારી મલ્ટીટાસ્કિંગ ટેકનિકથી અભિભૂત થઈ ગઈ છું. તું બેસ્ટ સિસ્ટર એવોર્ડ મેળવવાને પાત્ર છે'.

ઉલ્લેખનીય છે કે, ગૌહર અને ઝૈદે 25મી ડિસેમ્બરે લગ્ન કર્યા હતા. ગૌહર સાથે સારું બોન્ડિંગ ધરાવતી નિગાર આ મહિનાની શરુઆતમાં મુંબઈ આવી ગઈ હતી. તેને લેવા માટે ગૌહર અને ઝૈદ એરપોર્ટ ગયા હતા. જ્યાં ઢોલ વગાડીને તેનું સ્વાગત કરવામાં આવ્યું હતું. આ સમયે બંને બહેનોના કેટલાક ફ્રેન્ડ્સ પણ હાજર રહ્યા હતા. આ દરમિયાનની તસવીરો અને વીડિયો સોશિયલ મીડિયા પર તેમણે શેર કર્યા હતા.