'મર્યાદા' સીરિયલના 10 વર્ષ: રાકેશ બાપટે પૂર્વ પત્ની રિદ્ધિ ડોગરા સાથે શેર કરી તસવીર

ટેલિવિઝન સીરિયલ 'મર્યાદા: લેકિન કબ તક'ને 10 વર્ષ પૂરા થયા છે. આ સીરિયલમાં એક્ટર રાકેશ બાપટ અને રિદ્ધિ ડોગરાએ કામ કર્યું હતું. આ શો ઘણા પ્રકારે રૂઢિ તોડનારો અને સમયથી આગળ ઘણી શકાય તેવો હતો. 'મર્યાદા' સીરિયલનો દશકો પૂરો થતાં રાકેશ બાપટે ઈન્સ્ટાગ્રામ અકાઉન્ટ પર તેનું પોસ્ટર શેર કર્યું હતું. જેમાં રિદ્ધિ અને રાકેશ એકબીજાને ભેટેલા જોવા મળે છે.

રાકેશે આ પોસ્ટર શેર કરતાં લખ્યું, "શો જે પોતાના સમય કરતાં આગળ હતો અને ભારતીય ટેલિવિઝનની રૂઢિઓ તોડનારો હતો. દરેક રીતે બોલ્ડ અને સુંદર. #Maryada #10yrs #Adya #Anniversary #love #gratitude #nostalgia." રિદ્ધિ ડોગરાએ રાકેશ બાપટની આ પોસ્ટને ઈન્સ્ટાગ્રામ સ્ટોરીમાં શેર કરી હતી.


આ શોમાં એક પરિવારના ગૂંચવાયેલા સંબંધોની વાત હતી, જે સમાજમાં પોતાનો મોભો જાળવી રાખવા માટે ખોટી છાપ ઊભી કરે છે. લીડ એક્ટ્રેસ રિદ્ધિ ડોગરા શોમાં સતામણી કરનારા (એક્ટર વિશ્વજીત પ્રધાન)ના દીકરા (રાકેશ બાપટ)ના પ્રેમમાં પડે છે. સીરિયલમાં રિદ્ધિ અને રાકેશના લગ્ન થયા છે અને તે પતિને હકીકત જણાવે છે બાદમાં તે તેનું સમર્થન કરે છે.

સીરિયલમાં વિશ્વજીતના પાત્રનું ચક્કર તેની નાની સાળી (એક્ટ્રેસ કામ્યા પંજાબી) સાથે ચાલતું હોય છે. સીરિયલમાં વિશ્વજીતની પત્નીનો રોલ ઈન્દ્રાણી હલદારે કર્યો હતો, જેને તેના પતિની કરતૂતો વિશે જાણ હોય છે પરંતુ સમાજના દબાણ અને પતિના ડરથી ચૂપ રહે છે. જો કે, આ શોની ટીકા પણ થઈ હતી અને થોડા જ મહિનાઓ બંધ થઈ ગયો હતો.

રાકેશ બાપટ અને રિદ્ધિ ડોગરા આ સીરિયલના સેટ પર જ મળ્યા અને પ્રેમમાં પડ્યા હતા. થોડા વર્ષોના લગ્નજીવન બાદ રિદ્ધિ અને રાકેશ અલગ થઈ ગયા છે. રિદ્ધિ અને રાકેશે 2011માં લગ્ન કર્યા હતા અને આઠ વર્ષ બાદ 2019માં કપલ અલગ થયું હતું. જો કે, છૂટા પડ્યા પછી આજે પણ તેમના વચ્ચે મિત્રતાભર્યો સંબંધ છે.