કોરોનાના કારણે સેટ પર સાથે નથી જમતાં આ શોના એક્ટર્સ, વિડીયો કૉલથી રહે છે જોડાયેલા

બધી જ તકેદારી રાખતા હોવા છતાં યુક્તિનું માનવું છે કે, આ મહામારીના સમયમાં શૂટિંગ કરવું સરળ નથી. યુક્તિએ કહ્યું, "શરૂઆતમાં મારા માતા-પિતા મને પાછી આવવા દેવા માટે રાજી નહોતા. મેં તેમને ખૂબ સમજાવ્યા કે હું તમામ જરૂરી પગલાં ભરીશ. સેટ પર અમે અમારી જાતને ત્રણ અલગ-અલગ સ્તરે સેનિટાઈઝ કરીએ છીએ અને વિવિધ ચેકપોસ્ટ પરથી પસાર થઈએ છીએ. અમે માસ્ક અને ફેસશિલ્ડ પહેરીએ છીએ ઉપરાંત હાથ વારંવાર સેનિટાઈઝ કરીએ છીએ."

સાથી કલાકારો અને ટીમના મેમ્બર્સ સાથે ભોજન કરવાથી માંડીને સેટ પર થતી મસ્તીને યુક્તિ ખૂબ યાદ કરે છે. તેણે કહ્યું, "મારા કો-વર્કર્સને સેટ પર મળીને ખૂબ સારું લાગે છે. પરંતુ હું તેમની સાથે મળીને જે મસ્તી કરતી હતી અને સમય વિતાવતી હતી તેને યાદ કરું છું. અગાઉ અમે મિત્રોની જેમ મજાક-મસ્તી કરતા હતા. હું ભાવિકા શર્મા (યુક્તિની કો-એક્ટર)ના પ્રેન્ક ખૂબ યાદ કરું છું. તે અમારા બધામાં સૌથી નાની છે અને ક્યૂટ છે. બ્રેક દરમિયાન તેને મારા ખોળામાં આવીને બેસવાની ટેવ હતી પરંતુ હવે બધું જ બદલાઈ ગયું છે. હવે અમે એકબીજાને ભેટી પણ નથી શકતા. સોશિયલ ડિસ્ટન્સિંગના નિયમોનું પાલન કરવા માટે અમે એકબીજા સાથે લંચ પણ નથી કરતા અને પોતપોતાના મેકઅપ રૂમમાં જમીએ છીએ. જૂના દિવસોને ફરીથી યાદ કરવા માટે અમે લંચ બ્રેકમાં એકબીજાને વિડીયો કૉલ કરીએ છીએ. જેથી એવું લાગે કે અમે સાથે બેસીને જમીએ છીએ."

યુક્તિએ આગળ કહ્યું, "જ્યારે હું શૂટિંગ ના કરતી હોઉં ત્યારે મારે સેટ પર માસ્ક પહેરી રાખવું પડે છે. આ સ્થિતિમાં ગભરામણ થાય છે. હું વિચારું છે કે મેકઅપ આર્ટિસ્ટ આખો દિવસ PPE કિટ કેવી રીતે પહેરીને રાખતા હશે. તેમના માટે મારા દિલમાં માન વધી ગયું છે. મને અહેસાસ થયો કે આપણે પરિસ્થિતિથી ભાગવા કરતાં તેને સ્વીકારી લેવી જોઈએ. આપણે સૌએ તકેદારી રાખીને આની સાથે જીવતા શીખવું જોઈએ."