કંગનાના પોસ્ટર્સ પર ચપ્પલ મારતી મહિલાઓને જોઈને શિલ્પાએ કહ્યું 'સ્ત્રી જ સ્ત્રીની દુશ્મન'

કંગના રનૌત સામે વિરોધ પ્રદર્શન કરી રહેલી અને તેના પોસ્ટર્સ પર મહિલાઓ ચપ્પલ વરસાવી રહી હોય તેવો વીડિયો સોશિયલ મીડિયા પર વાયરલ થયો છે. જેને બિગ બોસ 11ની વિનર શિલ્પા શિંદેએ પણ સોશિયલ મીડિયા પર શેર કર્યો છે અને રોષ પ્રગટ કર્યો છે. કેપ્શનમાં તેણે લખ્યું છે કે, 'મહિલાઓ જ મહિલાની દુશ્મન હોય છે'.

બોલિવુડ એક્ટ્રેસ કંગના રનૌતે પોતાના સ્ટેટમેન્ટથી ઘણીવાર પોતાની જાતને કોન્ટ્રોવર્સીમાં મૂકી છે. તે પછી સારુ હોય કે ખરાબ તેનું સ્ટેટમેન્ટ હંમેશા ચર્ચાનું વિષય રહ્યું છે. હાલમાં, કંગનાએ મુંબઈને પાકિસ્તાન અધિકૃત કાશ્મીર સાથે સરખાવ્યું હતું. જેના ટ્વીટનો જવાબ આપતા શિવસેનાના નેતા સંજય રાઉતે કહ્યું હતું કે, જો કંગનાને મુંબઈ પોલીસથી એટલો જ ડર લાગતો હોય તો તેણે મુંબઈ ન આવવું જોઈએ.



તેનું આ ટ્વીટ વાયરલ થતાં મહિલાઓએ એક્ટ્રેસ સામે વિરોધ નોંધાવ્યો હતો અને તેના પોસ્ટર્સને ચપ્પલથી ફટકારી રહ્યા હોય તેવો વીડિયો સોશિયલ મીડિયામાં વાયરલ કર્યો હતો. શિલ્પા શિંદએ આ બાબતને વખોડી કાઢી છે.

ઈન્સ્ટાગ્રામ પર શિલ્પાએ લખ્યું છે કે, મહિલાઓ જ મહિલાની દુશ્મન. આ મહિલાઓને આ શરમજક કામ કરવા માટે કેટલા રૂપિયા મળ્યા હશે? ઘરમાં આ મહિલાઓ પોતાના પતિનો માર ખાતી હશે તેનો જ ગુસ્સો તેઓ પોસ્ટર્સ પર કાઢી રહી છે.

શિલ્પા શિંદે 'ગેંગ્સ ઓફ ફિલ્મીસ્તાન'નો ભાગ હતી, જો કે પ્રીમિયર પહેલા જ તેણે શો છોડી દીધો હતો. તેને કામના કલાકો અને એક્ટર-કોમેડિયન સુનીલ ગ્રોવર સાથે વાંધો પડ્યો હતો.