ગ્લેમર ઈન્ડસ્ટ્રીમાં વધુ એક TV એક્ટરની આત્મહત્યા, એપાર્ટમેન્ટમાં મળી આવ્યો મૃતદેહ

મુંબઈઃ 14 જુલાઈના રોજ સુશાંત સિંહ રાજપૂત પોતાના જ ઘરમાં મૃત હાલતમાં મળી આવ્યો હતો. આ મામલે વધુ તપાસ ચાલી રહી છે ત્યાં જ ગ્લેમર ઈન્ડસ્ટ્રીમાં વધુ એક આંચકાજનક સમાચાર સામે આવી રહ્યાં છે. ટીવી એક્ટર અક્ષત ઉત્કર્ષ જે બિહારથી સપનાં લઈને માયાનગરી મુંબઈમાં ગ્લેમર ઈન્ડસ્ટ્રીમાં સ્થાન જમાવવા માટે આવ્યો હતો. તે અંધેરી સ્થિત એપાર્ટમેન્ટમાં મૃત હાલતમાં મળી આવ્યો છે. એક્ટરે કથિત રીતે આત્મહત્યા કરી હોવાનું જાણવા મળ્યું છે.

મૂળ બિહારનો છે અક્ષત
આ ઘટના અંગે પોલીસ તપાસ કરી રહી છે અને પોલીસનું કહેવું છે કે, મનોરંજન ઈન્ડસ્ટ્રીમાં કામ ઓછું મળતું હોવાના કારણે તેણે માનસિક તણાવના કારણે આત્મહત્યા કરી છે. 26 વર્ષનો એક્ટર મૂળ બિહારના મુઝફ્ફરનગરનો રહેવાસી છે. રવિવારે રાતે અક્ષતે પોતાના ફ્લેટમાં ગળેફાંસો ખાઈને જીવ આપ્યો હતો. અક્ષત મુંબઈમાં પ્રાઈવેટ કંપનીમાં નોકરી કરવાની સાથે સાથે જ એક્ટિંગમાં પણ સક્રિય હતો.

પરિવારજનોએ પોલીસ પર લગાવ્યા આરોપ
આ સમગ્ર ઘટના મામલે પરિવારનું કહેવું છે કે, પોલીસે યોગ્ય તપાસ કરી નથી. આ ઘટના અંગે પોલીસ પર ઢીલ મૂકવાનો પણ પરિવારજનો દ્વારા આરોપ લગાવવામાં આવ્યો છે. જોકે, પોસ્ટમોર્ટમ પછી આ ટીવી એક્ટરનો મૃતદેહ બિહાર લઈ જવામાં આવ્યો છે. અક્ષતના મોત અંગે તેની ગર્લફ્રેન્ડે પોલીસને સૂચના આપી હતી. અક્ષત અપકમિંગ ફિલ્મ 'લિટ્ટી ચોખા'માં જોવા મળશે. આ ફિલ્મમાં ખેસારી લાલ યાદવ લીડ રોલમાં છે.

કાકાએ પોલીસમાં નોંધાવ્યું નિવેદન
પોલીસનું કહેવું છે કે, અક્ષતે ટૂવાલથી ગળેફાંસો ખાધો હતો અને ગૂંગળાઈ જવાના કારણે તેનું મોત થયું હતું. અક્ષતના કાકા વિક્રમ કિશોરે પોલીસને આપેલા નિવેદનમાં જણાવ્યું કે, અક્ષત સ્ટ્રગલિંગ એક્ટ્રેસ સ્નેહા ચૌહાણ સાથે રહેતો હતો. બન્ને ખૂબ જ નજીક હતાં. તો કાકાએ આકાંક્ષા દુબે નામની અન્ય એક યુવતી વિશે પણ પોલીસને જાણકારી આપી છે. આકાંક્ષા એમબીએમાં અક્ષતની સાથે અભ્યાસ કરતી હતી.