લગ્નના 6 વર્ષ બાદ મા બની ટીવી એક્ટ્રેસ પ્રણિતા પંડિત, દીકરીને આપ્યો જન્મ

લગ્નના 6 વર્ષ પછી પ્રણિતા અને શિવિના ઘરે પારણું બંધાયું છે. જો કે, કપલે હજી દીકરીનું નામ વિચાર્યું નથી. એક્ટ્રેસે કહ્યું, "અમે માત્ર કોવિડ અને ક્વોરન્ટીન નામ વિચાર્યા છે." હસતાં હસતાં પ્રણિતાએ આગળ કહ્યું, "આ તો માત્ર મજાક હતી પણ સાચું કહું તો કોરોના મહામારી દરમિયાન બાળકને જન્મ આપવા બાબતે હું શરૂઆતમાં ખૂબ ચિંતાતુર હતી. જો કે, મેં આ સમયની પોઝિટિવ સાઈડને જોઈ કે મને પરિવાર અને પતિ સાથે ઘણો જ સમય વિતાવવા મળ્યો. અમારું બોન્ડ વધારે મજબૂત થયું. મારી દીકરી લોકડાઉન બેબી છે અને આ આખા વર્ષમાં કોઈ સારા સમાચાર મળ્યા હોય તો આ જ છે."

દીકરીનું નામ પાડવા અંગે પ્રણિતાએ કહ્યું, "હું રાશિમાં માનું છું અને તે પ્રમાણે દ, થ અને ઝ અક્ષરો આવ્યા છે. એટલે આ અક્ષરમાંથી કોઈ એક પસંદ કરીને અમે જલદી જ નામ પાડીશું. હાલ તો હું માતૃત્વને માણવા માગુ છું. હું સુપરમોમ બનવા નથી માગતી પરંતુ મારી દીકરી માટે શક્ય હોય તે બધી જ વસ્તુ કરવા માગુ છું."

છેલ્લે સીરિયલ 'કવચ 2'માં જોવા મળેલી પ્રણિતાએ આગળ જણાવ્યું, "છેલ્લા પાંચ મહિનાથી હું ઘરની બહાર નથી નીકળી અને આગામી થોડા સમય સુધી પણ નહીં નીકળું. હું મારા બાળક સાથે રહેવા માગુ છું. જો કે, કામમાંથી લાંબો બ્રેક નહીં લઉં. હું જલદીથી જલદી કામ પર પરત ફરવા માગુ છું. મારી દીકરી પાસે હું જે અપેક્ષાઓ રાખું છું તેને હું પહેલા મારી જાતે પૂરી કરવા માગુ છું અને કામ મારા જીવનનું અભિન્ન અંગ છે."

હાલ તો પ્રણિતાને ફેન્સ અને ફ્રેન્ડ્સ વર્ચ્યુલ શુભેચ્છા સંદેશ આપી રહ્યા છે. પ્રણિતાએ જણાવ્યું, "મારી દીકરીનો જન્મ થયો ત્યારથી મને ઘણાં લોકોએ વિડીયો કોલ કર્યા છે. મારું નાનકડું ફ્રેન્ડ સર્કલ છે અને જલદીથી જલદી એક મુલાકાત ગોઠવવા માગુ છું. જેથી મારા મિત્રો મારી દીકરીને રમાડી શકે."