'યે રિશ્તા...'ના એક્ટરનું થયું બ્રેકઅપ, 6 મહિના પહેલા થઈ હતી રોકા સેરેમની

એન્ટરટેન્મેન્ટ ઈન્ડસ્ટ્રીમાં ક્યારે કોની વચ્ચે અફેર શરુ થઈ જાય અને ક્યારે કોની વચ્ચે બ્રેકઅપ થઈ જાય તે અંગે કંઈ પણ કહેવું ખૂબ મુશ્કેલ છે. ટીવી કપલ સંજીદા શૈખ અને આમિર અલી તેમજ કરણ કુંદ્રા અને અનુષા દાંડેકરના બ્રેકઅપ બાદ ઈન્ડસ્ટ્રીના વધુ એક એક્ટરનું દિલ તૂટ્યું હોવાનું સામે આવ્યું છે.

'યે રિશ્તા ક્યા કહેલાતા હૈ'ના એક્ટર આશીષ કપૂર કે જે છેલ્લા બે વર્ષથી વિદેશી મોડેલ ઈડા ક્રોની (IIDA KRONI) સાથે રિલેશનશિપમાં હતો, તેનું બ્રેકઅપ થયું છે. આશીષ અને ઈડાએ સગાઈ કરી લીધી હોવાના પણ વચ્ચે ન્યૂઝ હતા, આટલું જ નહીં તેઓ પોતાના સંબંધને આગામી સમયમાં નેક્સ્ટ લેવલ પર લઈ જવાનું પ્લાનિંગ પણ કરી રહ્યા હતા. જો કે, સ્પોટબોયના રિપોર્ટ પ્રમાણે, હવે બંને એકબીજાના સંપર્કમાં નથી.

સૂત્રોના જણાવ્યા પ્રમાણે, આશીષ અને ઈડા થોડા સમય પહેલા જ અલગ થઈ ગયા હતા. બે વર્ષથી એકબીજાના ગળાડૂબ પ્રેમમાં રહેલું કપલ હવે વાત કરવા પણ તૈયાર નથી. બંનેના બ્રેકઅપ વિશે આશીષ કપૂરના માત્ર નજીકના લોકો જ જાણે છે. જો કે, એક્ટરે હજુ આ અંગે કોઈ પુષ્ટિ કરી નથી.

આશીષ કપૂર અને ઈડા ક્રોનીની મુલાકાત દિલ્હીમાં એક કોમન ફ્રેન્ડ દ્વારા થઈ હતી. એક્ટરે 31 ડિસેમ્બર, 2017માં ઈડાને પ્રપોઝ કર્યું હતું અને તેણે તરત જ હા પાડી દીધી હતી. બંનેના પરિવારના સભ્યો પણ તેમના સંબંધો વિશે સારી રીતે જાણતા હતા. 2 જાન્યુઆરીએ કપલની રોકા સેરેમની પણ થઈ હોવાના રિપોર્ટ્સ છે. આશીષે તે ઈડા સાથે રિલેશનશિપમાં હોવાની વાત સ્વીકારી હતી પરંતુ ગુપચુપ રીતે સગાઈ કરી હોવાની વાત સ્વીકારી નહોતી.

આશીષ કપૂર છેલ્લે ટીવી શો 'વો અપના સા'માં જોવા મળ્યો હતો. આ પહેલા એક્ટર 'દેખા એક ખ્વાબ'ની એક્ટ્રેસ પ્રિયાલ ગોર સાથે રિલેશનશિપમાં હતો. શો ઓફ-એર થયા બાદ તેમના વચ્ચેના સંબંધો તૂટી ગયા હતા. આશીષ અત્યારસુધીમાં વારિસ, સરસ્વતીચંદ્ર, સાવિત્રી, યે રિશ્તા ક્યા કહેલાતા હૈ અને સાત ફેરેઃ સલોની કા સફર જેવા શોમાં જોવા મળી ચૂક્યો છે.