કોરોના પર જીત મળતા ન્યુઝીલેન્ડના વડાંપ્રધાને મંદિરની મુલાકાત લીધી?

દાવો

ન્યુઝીલેન્ડના વડાંપ્રધાન જેસિંડા અર્ડર્ન (Jacinda Ardern) ઘણી વખત ચર્ચામાં રહે છે. હવે સોશિયલ મીડિયા પર તેમનો એક વિડીયો એ પ્રકારના દાવાની સાથે શેર કરવામાં આવી રહ્યો છે કે ન્યુઝીલેન્ડ કોરોના વાયરસ મુક્ત થયા પછી તેમણે સૌપ્રથમ હિન્દુ મંદિરની મુલાકાત લીધી હતી.

ફેસબુક પેજ Achhe Dinએ આ વિડીયો પોસ્ટ કર્યો છે અને સાથે લખ્યું છે કે ન્યુઝીલેન્ડ કોરોના વાયરસ મુક્ત થયા પછી ત્યાંના વડાંપ્રધાન હિન્દુ મંદિરમાં પૂજા કરવા માટે પહોંચ્યા હતા. આ વિડીયોને આ પ્રકારના દાવા સાથે કેટલાંક યૂઝર્સે ટ્વિટર પર પણ શેર કર્યો છે.

શું છે સત્ય?

ન્યુઝીલેન્ડના વડાંપ્રધાન જેસિંડા આર્ડર્ન દેશમાં આગામી ચૂંટણીને ધ્યાનમાં રાખતા તારીખ 6 ઓગસ્ટના રોજ મંદિરની મુલાકાતે ગયા હતા. જ્યાં તેમણે ભારતીય ફૂડનો પણ સ્વાદ માણ્યો હતો.

કેવી રીતે કરી તપાસ?

ટાઈમ્સ ઓફ ઈન્ડિયા પર પ્રકાશિત પીટીઆઈના સમાચાર મુજબ ન્યુઝીલેન્ડના વડાંપ્રધાન જેસિંડા આર્ડર્ન દેશમાં આગામી ચૂંટણીને ધ્યાનમાં રાખતા હિન્દુ મંદિરની મુલાકાતે ગયા હતા. ન્યુઝીલેન્ડમાં આ વર્ષે તારીખ 19 સપ્ટેમ્બરના રોજ ચૂંટણી યોજાશે.

આ ન્યૂઝમાં અમને મુક્તેશ પરદેસીનું ટ્વિટ મળ્યું કે જેઓ ન્યુઝીલેન્ડમાં ભારતના હાઈ કમિશનર છે. તેમણે આ ફોટોગ્રાફ્સ શેર કરતા લખ્યું કે તારીખ 6 ઓગસ્ટના રોજ ઈન્ડિયન ન્યૂઝ લિંકની ઈવેન્ટ દરમિયાન ન્યુઝીલેન્ડના વડાંપ્રધાન જેસિંડા અર્ડર્નની સાથે પસાર કરેલો થોડો સમય. આ દરમિયાન તેમણે રાધા કૃષ્ણ મંદિરની મુલાકાત લીધી અને પુરી-છોલે સહિત દાળ જેવા ઈન્ડિયન ફૂડનો સ્વાદ માણ્યો.

તારીખ 10 ઓગસ્ટના રોજ ન્યુઝીલેન્ડમાં 100 દિવસથી એકપણ કોરોના પોઝિટિવ કેસ નહોતો. પણ, તારીખ 11 ઓગસ્ટના રોજ મંગળવારે કોરોનાના નવા 4 દર્દી સામે આવ્યા બાદ ત્યાં નિયમો વધુ કડક કરવામાં આવ્યા છે.

તારણ

ટાઈમ્સ ફેક્ટ ચેકને જાણવા મળ્યું છે કે ન્યુઝીલેન્ડના વડાંપ્રધાન જેસિંડા અર્ડર્ને મંદિરની મુલાકાત લીધી તે પાછળનું કારણ ન્યુઝીલેન્ડમાં કોરોનાના કેસ ઝીરો થઈ ગયા હતા તે નથી. તેમણે ન્યુઝીલેન્ડમાં આગામી ચૂંટણીને ધ્યાનમાં રાખતા મંદિરની મુલાકાત લીધી હતી.