અમદાવાદ પોલીસે આપી લોકોને વોર્નિંગ: આ વિડીયોને ભૂલથી પણ શેર ના કરશો

અમદાવાદ: શાહઆલમમાં ગઈકાલે થયેલા તોફાનો બાદ સોશિયલ મીડિયામાં અનેક વિડીયો ફરી રહ્યા છે. જેમાં એક વિડીયો પોલીસ લોકો પર લાઠીચાર્જ કરી રહી છે તેવો પણ ફરી રહ્યો છે. વિડીયોમાં એવો દાવો કરવામાં આવી રહ્યો છે કે, અમદાવાદની પોલીસે લોકો પર લાઠીચાર્જ કર્યો હતો. જોકે, પોલીસે જણાવ્યું છે કે, આ વિડીયો અમદાવાદનો નહીં પરંતુ લખનઉનો છે.હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરોલખનઉમાં પણ ગઈકાલે CAAના વિરોધમાં જોરદાર તોફાનો થયા હતા. શહેરમાં ચારે તરફ હિંસા ફાટી નીકળી હતી અને ટોળાંએ બે પોલીસ ચોકીઓ પણ ફુંકી મારી હતી. લખનઉમાં તોફાનો દરમિયાન અનેક સ્થળે વાહનો પણ સળગાવી દેવાયા હતા. સ્થિતિ એટલી તંગ હતી કે પોલીસે ઠેરઠેર લાઠીચાર્જ કરીને ટોળાંને વિખેરવું પડ્યું હતુ. પોલીસની કાર્યવાહીના ઘણા વિડીયો હાલ સોશિયલ મીડિયા પર વાયરલ છે.અમદાવાદ પોલીસની ફેસબુક પોસ્ટ જોકે, અમદાવાદમાં લખનઉ જેટલી ભયાનક હિંસા નથી થઈ. શહેરના શાહઆલમ અને ખાનપુરમાં પથ્થરમારાની ઘટનાઓ જ બની હતી. આ સિવાય સરદાર બાગ પાસે ભેગા થયેલા લોકોને વિખેરવા માટે પોલીસે લાઠીચાર્જ કર્યો હતો. જોકે, લખનઉ જેટલી શહેરમાં સ્થિતિ ગંભીર નહોતી છતાંય કેટલાક તત્વો દ્વારા પોલીસને બદનામ કરવા માટે લખનઉનો વિડીયો અમદાવાદના નામે ફરતો કરવામાં આવ્યો છે.માહોલ તંગ હોય ત્યારે સોશિયલ મીડિયા પર અફવાઓ તેમજ ફેક વિડીયોને પણ છૂટો દોર મળી જતો હોય છે, જે ઘણીવાર બળતામાં ઘી હોમવાનું કામ કરે છે. આ જ વાતને ધ્યાનમાં રાખીને અમદાવાદ પોલીસે લોકોને વોર્નિંગ આપી છે કે તેઓ ફેક વિડીયો કે પછી લોકોને ઉશ્કેરે તેવા કોઈપણ મેસેજને જોયા-જાણ્યા અને ચકાસ્યા વિના ફોરવર્ડ ન કરે. પોલીસે એમ પણ કહ્યું છે કે જો આવું કોઈ કરશે તો તેની સામે કાયદાકીય પગલાં લેવાશે.અગાઉ પણ ગુજરાતમાં ઉત્તર ભારતીયો વિરુદ્ધ હુમલાની ઘટનાઓ બની હતી તેમજ પદ્માવત ફિલ્મનો વિરોધ થયો હતો ત્યારે ઉશ્કરણીજનક વિડીયો ફરતા કરનારા કેટલાક શખ્સોની પોલીસ દ્વારા ધરપકડ કરવામાં આવી હતી. IamGujarat પણ પોતાના વાચકોને વિનંતી કરે છે કે વ્હોટ્સએપ પર આવેલા કોઈપણ વિડીયો કે મેસેજને સાચા ન માની લેવા, અને સમાચાર માટે હંમેશા વિશ્વાસપાત્ર મીડિયાનો જ આધાર રાખવો.

ગ્રાઉન્ડ રિપોર્ટ: શાહઆલમાં ગુરુવારે આખરે શું થયું હતું?