ટેટ-1 પાસ હજારો ઉમેદવારોની ભરતી ન કરાતાં 18મીએ ધરણાં

નવગુજરાત સમય > અમદાવાદ

– ગુજરાતમાં છેલ્લા એક વર્ષથી ટેટ-૧ની પરીક્ષા લેવામાં આવ્યા પછી પણ હજુસુધી અગમ્ય કારણોસર ભરતી કરાતી નથી. અનેક ઉમેદવારો મેરિટમાં અગ્રતાક્રમ ધરાવતાં હોવા છતાં ભરતીમાં વિલંબ થવાથી વયમર્યાદાના કારણે નોકરીથી વંચિત રહે તેવી સ્થિતિ ઊભી થઇ છે. વારંવારની રજૂઆતો છતાં શિક્ષણ વિભાગ અને સરકાર દ્વારા આ ઉમેદવારોના પ્રશ્નોના ઉકેલ લાવવામાં ન આવતાં હવે ઉમેદવારોએ આગામી તા.૧૯મી જુલાઇએ ગાંધીનગર સત્યાગ્રહ છાવણી, સેક્ટર-૬ ખાતે ધરણાં કરવાની જાહેરાત કરી છે. આશ્રર્યની વાત એ કે એક બાજુ ટેટ-૧ પાસ કરનારા ઉમેદવારે ભરતીની રાહ જોઇ રહ્યા છે બીજી બાજું સરકાર શિક્ષકો નહીં હોવાના બહાને પ્રવાસી શિક્ષકોથી કામ ચલાવવાના દેખાવો કરી રહી છે. ગુજરાતમાં છેલ્લા બે વર્ષમાં ટેટ-૨ પાસ કરનારા ઉમેદવારોની સળંગ બે વખત ભરતી કરાઈ છે. પરંતુ ટેટ-૧ની વર્ષ ૨૦૧૫માં લેવાયેલી પરીક્ષા બાદ પરિણામ પણ જાહેર કરી દેવાયું છે. પરંતુ અગમ્ય કારણોસર ભરતી કરાતી નથી. હાલમાં રાજયમાં જુદા જુદા જિલ્લાઓ અને તાલુકા કક્ષાની શાળાઓમાં ૧૨ હજાર જેટલી જગ્યાઓ ખાલી પડી છે. તાજેતરમાં સરકાર દ્વારા પ્રવેશોત્સવ થકી હજારો બાળકોને શાળામાં મોકલવામાં આવ્યા હતા. પરંતુ જે શાળામાં બાળકો ભણવા માટે જવાના છે તે શાળામાં ૧૨ હજાર જેટલા શિક્ષકોની જગ્યાઓ ખાલી પડી છે તેની સામે ઉમેદવારો પણ ભરતીની રાહ જોઇ રહ્યા છે તે અંગે કોઇ કાર્યવાહી કરવામાં આવતી નથી. ટેટ-૧ પાસ કરનારા ઉમેદવારો દ્વારા છેલ્લા કેટલાય સમયથી ગાંધીનગરમાં ધક્કા ખાઇને કયારે ભરતી થશે તેની જાણકારી મેળવવા પ્રયાસ કરવા છતાં કોઇ કાર્યવાહી થતી નથી. આખરે તમામ ઉમેદવારોએ આગામી તા. ૧૮મી જુલાઇએ ગાંધીનગર ખાતે ધરણાં પર બેસવાની જાહેરાત કરી છે. ઉમેદવારો દ્વારા તાકીદે ટેટ-૧ પાસ થયેલા ૬ હજાર ઉમેદવારોની ભરતી કરવી, સરકારની બેદરકારી અને વિલંબના કારણે જે ઉમેદવારોની ભરતીની વયમર્યાદા વટાવી ગયા હોય તેમને ન્યાય મળે અને સરકાર દ્વારા ૧૦ વર્ષના બોન્ડનો નિર્ણય કરાયો છે તે દૂર કરવાની માગણી કરવામાં આવી છે.