રસ્તે રઝળતી ગાય બીમાર પડી, ડોક્ટર્સે ઓપરેશન કરી પેટમાંથી 100 કિલો કચરો કાઢ્યો

હિમાંશુ કૌશિક, અમદાવાદઃ શહેરમાં ઠેર ઠેર ઠાલવવામાં આવતા કચરાના ઢગ જાણે રસ્તે રઝળતી ગાયો માટે ખાવાનાં સ્થળ બની ગયાં છે. રસ્તે પડેલો કચરો આરોગીને ગાયો બીમારીનો ભોગ બની રહી છે. જીવદયા ચેરિટેબલ ટ્રસ્ટની હોસ્પિટલના ડોક્ટર્સે શુક્રવારે આવી જ એક ગાયના પેટમાંથી લોખંડ, પ્લાસ્ટિક બેગ્સ, ખિલ્લા, મોજાં સહિત આશરે 100 કિલો કચરો કાઢ્યો હતો. આ ગાયને સાબરમતી વિસ્તારમાંથી લાવવામાં આવી હતી.

જીવદયા ચેરિટેબલ ટ્રસ્ટના કાર્તિક શાસ્ત્રીએ કહ્યું હતું કે, ગાયને સાબરમતી વિસ્તારમાંથી બચાવીને ટ્રસ્ટની હોસ્પિટલમાં સારવાર માટે લાવવામાં આવી હતી. સારવાર દરમિયાન ડોક્ટર્સને જાણવા મળ્યું હતું કે ગાય ગર્ભવતી છે અને નબળી પડી ગઈ છે. ગાય ચાલી શકે તેવી સ્થિતિમાં પણ નહોતી. ત્યાર બાદ ડોક્ટર્સે ઓપરેશન કરવાનું નક્કી કર્યું હતું. ઓપરેશન દરમિયાન ડોક્ટર્સે ગાયના પેટમાંથી ત્રણ ડોલ ભરીને કચરો કાઢ્યો હતો, જેમાં ખિલ્લા, સ્ક્રૂ, વાયર્સ, પોલિથિન, પ્લાસ્ટિક્સ, કપડાંના ટુકડા, મોજાં મળી આવ્યાં હતાં. ચાર માઇક્રોનથી પાતળી પોલિથિન પણ કાઢવામાં આવી હતી.

શાસ્ત્રી જણાવે છે કે, ગાયના પેટમાંથી પ્લાસ્ટિક વેસ્ટ કાઢવામાં આવ્યો હોય તેવો આ પહેલો કિસ્સો નથી. અગાઉ પણ આવું બન્યું છે. આ પહેલાં પણ એક ગાયના પેટમાંથી 25થી 40 કિલોગ્રામ કચરો કાઢવામાં આવ્યો હતો.

શહેરભરમાં ઠેર ઠેર રસ્તે રઝળતી ગાયો જોવા મળી રહી છે અને દિવસભર ફરીને તેઓ રસ્તા પર પડેલો કચરો આરોગવા મજબૂર બને છે. રાજ્યનાં કેટલાંક શહેરોમાં આવી ગાયોને બચાવવા માટે કેટલીક સામાજિક સંસ્થાઓ કાર્યરત છે, પરંતુ પશુપાલકો દ્વારા ગાયોને રઝળતી મૂકી દેવાતાં તેઓ રસ્તે પડેલા પોલિથિન, કાગળો, પ્લાસ્ટિક જેવો કચરો ખાતી હોય છે. આ પહેલાં પણ ગાયના પેટમાંથી મોટા પ્રમાણમાં કચરો કાઢવામાં આવ્યો હોવાના કિસ્સા બની ચૂક્યા છે.