ઘણી મોટી જવાબદારીઓ સંભાળી ચૂક્યા છે ભાટિયા
આશિષ ભાટિયા અમદાવાદના કમિશનરથી ડીજીપી બન્યા છે. તે અગાઉ તેઓ 2016મા સુરતના કમિશનર હતા. આ ઉપરાંત તેમણે ક્રાઈમ બ્રાન્ચના જેસીપી, રેલવેના ડીજીપી અને સીઆઈડી ક્રાઈમ વડાની જવાબદારીઓ સંભાળી છે. હવે તેઓ ગુજરાતના પોલીસ વડા તરીકેની જવાબદારી સંભાળશે.
શાંત મગજ રાખીને કેસો ઉકેલવામાં નિષ્ણાંત
આશિષ ભાટિયા 1985ની બેચના આઈપીએસ છે. તેમણે 2001મા પોલીસ મેડલ અને 2011મા પ્રેસિડેન્ટ મેડલ મેળ્યો છે. તેમની સૌથી મોટી ખાસિયત એ છે કે ગમે તેવી પરિસ્થિતિમાં તેઓ અત્યંત ધીરજ અને શાંત ચિત્તે કામ કરે છે. કોઈ પણ જાતની ઉતાવળ વગર તેઓ લાંબી પૂછપરછ કરીને આરોપી પાસે માહિતી કઢાવી લે છે. તેમની પૂછપરછ બાદ કેસની મોટા ભાગની માહિતી બહાર આવી જતી હોય છે.
19 દિવસમાં જ ઉકેલી દીધો અમદાવાદ સિરિયલ બ્લાસ્ટનો કેસ
2008મા અમદાવાદમાં થયેલા સિરિયલ બ્લાસ્ટે ગુજરાત જ નહીં પરંતુ દેશભરમાં ખળભળાટ મચાવી દીધો હતો. ત્યારે અમદાવાદ ક્રાઈમ બ્રાન્ચના જોઈન્ટ પોલીસ કમિશનર તરીકે ફરજ બજાવતા આશિષ ભાટિયાએ ધીરજ ગુમાવી ન હતી અને ફક્ત 19 દિવસની અંદર કેસ ઉકેલી દીધો હતો. આ કેસમાં ઈન્ડિયન મુજાહિદ્દીનનો હાથ હોવાનું સાબિત કરીને 30 જેટલા આરોપીઓનો પકડી લીધા હતા.
બિટકોઈન કાંડમાં પણ મળી હતી સફળતા
ગમે તેવો કેસ હોય પરંતુ આશિષ ભાટિયા પોતાની કુનેહપૂર્વક તેને ઉકેલવામાં માહેર છે. 2018મા સામે આવેલા ગુજરાતના સૌથી મોટા બિટકોઈન કૌભાંડને પણ તેમણે સફળતાપૂર્વક ઉકેલી દીધો હતો. એટલું જ નહીં તેમાં સંડોવાયેલા મોટા માથાઓને પણ બહાર લાવવામાં તેમણે પાછીપાની કરી ન હતી. આ કેસમાં જગદીશ પટેલ જેવા પોલીસ અધિકારીઓ તથા ભૂતપૂર્વ ધારાસભ્ય નલિન કોટડિયાની સંડોવણી હતી.
બહુચર્ચિત ભાનુશાળી હત્યા કેસને પણ ઉકેલ્યો
2019મા ભાજપના ભૂતપૂર્વ ધારાસભ્ય જયંતિ ભાનુશાળીની હત્યાથી રાજકિય જગતમાં ચકચાર મચી ગઈ હતી. જોકે, આ હાઈપ્રોફાઈલ કેસને પણ રેલવેના તત્કાલિન વડા આશિષ ભાટિયાએ ઉકેલી દીધો હતો. આશિષ ભાટિયાએ એક એસઆઈટી બનાવી હતી. આ હાઈપ્રોફાઈલ કેસમાં ભૂતપૂર્વ ધારાસભ્ય છબીલ પટેલની પણ ધરપકડ કરી હતી.