ગુજરાતના નવા ચીફ સેક્રેટરી તરીકે રાજકુમારની વરણી, 31 જાન્યુઆરીથી સંભાળશે ચાર્જ

ગાંધીનગર: રાજ્યના વરિષ્ઠ IAS અધિકારી તેમજ હાલ ગૃહ સચિવ તરીકે ફરજ બજાવી રહેલા રાજ કુમારને ચીફ સેક્રેટરી તરીકે નિયુક્ત કરવામાં આવ્યા છે. રાજ કુમાર 1987ની બેન્ચના આઈએએસ અધિકારી છે. રાજ કુમાર ગુજરાતમાં અનેક મહત્વના વિભાગમાં ફરજ બજાવી ચૂક્યા છે તેમજ કેન્દ્ર સરકારમાં પણ તેમણે જવાબદારી નિભાવી છે. તેમને દિલ્હીથી ગુજરાત પરત લવાયા ત્યારે જ એવી અટકળો શરુ થઈ ગઈ હતી કે તેમને ચીફ સેક્રેટરી બનાવવામાં આવશે. ડિસેમ્બર 2021માં તેમને દિલ્હીથી ગુજરાત પરત લાવવામાં આવ્યા હતા.

મૂળ યુપીના રાજ કુમાર એપ્રિલ 2015માં દિલ્હી ડેપ્યુટેશન પર ગયા હતા, જ્યાં તેમણે ફાઈનાન્સ, શ્રમ અને રોજગાર તેમજ સંરક્ષણ મંત્રાલયમાં ફરજ નિભાવી હતી. છેલ્લે તેઓ ડિફેન્સ પ્રોડક્શનના સેક્રેટરી હતા. 1965માં જન્મેલા રાજ કુમાર IIT કાનપુરમાંથી ઈલેક્ટ્રીક એન્જિનિયરિંગમાં બી.ટેક થયેલા છે. તેમણે ટોક્યોથી માસ્ટર ઈન પબ્લિક પોલિસીનો પણ અભ્યાસ કર્યો છે. રાજ કુમારની છબી એક કડક અધિકારી તરીકેની પણ છે. તેઓ પીએમ નરેન્દ્ર મોદીના પણ ખાસ ગણાય છે.

હાલના ચીફ સેક્રેટરી પંકજ કુમારને સરકાર પહેલા પણ એકથી વધુ એક્સટેન્શન આપી ચૂકી હતી. 31 જાન્યુઆરી 2023માં તેમનું એક્સ્ટેન્શન પૂરું થઈ રહ્યું હતું ત્યારે તેને વધુ લંબાવાય તેવી શક્યતા લગભગ ના બરાબર હતી. ઉલ્લેખનીય છે કે, મે 2022માં પંકજ કુમારને રાજ્યમાં થનારી વિધાનસભા ચૂંટણીને ધ્યાનમાં રાખી 8 મહિનાનું એક્સટેન્શન આપવામાં આવ્યું હતું. પંકજ કુમાર ઓગસ્ટ 2021માં ગુજરાતના ચીફ સેક્રેટરી બન્યા હતા. ચીફ સેક્રેટરી બનવાની રેસમાં એસ. અપર્ણાનું નામ પણ ચર્ચામાં હતું. જોકે, તેઓ આ વર્ષે નિવૃત્ત થઈ રહ્યા હોવાથી તેમના ચાન્સ ઓછા હતા. આ ઉપરાંત, રાજ્યના સૌથી વરિષ્ઠ IAS અધિકારીમાંના એક એવા વિપુલ મિત્રા પણ આ વર્ષે જ નિવૃત્ત થઈ રહ્યા હોવાથી તેમને પણ સીએસની ખુરશી નથી મળી શકી.

ગુજરાતના નવા ચીફ સેક્રેટરીનું નામ જાહેર થયા બાદ હવે ટૂંક જ સમયમાં નવા પોલીસ વડાનું નામ જાહેર થાય તેવી સંભાવના છે. હાલના ડીજીપી આશીષ ભાટિયાને અપાયેલું એક્સ્ટેન્શન પણ ટૂંક સમયમાં પૂર્ણ થઈ રહ્યું છે. ત્યારે જોવાનું એ રહે છે કે રાજ્ય સરકાર કોને તેમના સ્થાને નિયુક્ત કરે છે.