અ'વાદઃ PM મોદીએ ખુલ્લી મૂકેલી SVP હોસ્પિટલમાં પોલંપોલ, પાણી ભરાતા 4 ઓપરેશન થિયેટર બંધ

અમદાવાદઃ શહેરમાં સાબરમતિ રિવરફ્રન્ટ પર કરોડો રૂપિયાના ખર્ચે નવી બનાવાયેલી સરદાર વલ્લભભાઈ પટેલ હોસ્પિટલમાં પહેલા જ ચોમાસામાં પાણી લીકેજ થવાની ઘટના બની છે. હોસ્પિટલના 4 ઓપરેશન થિયેટર્સમાં ભરાઈ ગયું હતું. પરિણામે આ ચારેય ઓપરેશન થિયેટર્સ બંધ કરવામાં આવ્યા હતા. જોકે SVPના મેનેજમેન્ટે કહ્યું હતું કે આ ચારેય ઓપરેશન થીએટર્સને રેગ્યુલર મેઈન્ટેનન્સ માટે બંધ કરાયા છે. SVPના સ્ટાફે કહ્યું હતું કે, ઈમરજન્સી પેશન્ટને પણ પાછા મોકલીને એલ.જી કે સિવિલ હોસ્પિટલમાં મોકલવામાં આવી રહ્યા છે. અધિકારીએ જણાવ્યું હતું કે, હોસ્પિટલની દિવાલમાંથી પાણી લીકેજ થઈને આવ્યું હતું. જાન્યુઆરીમાં ઉદ્ધાઘટન કરાયેલી હોસ્પિટલ આ પહેલીવાર વખત આ પ્રકારની બાબતના લીધે ચર્ચામાં આવી નથી. હાલમાં જ હોસ્પિટલનો એક વિડીયો વાઈરલ થયો હતો જેમાં સ્ટાફ 15મા માળેથી પાણી કાઢવામાં વ્યસ્ત હતો. રૂપિયા 750 કરોડના ખર્ચે બનેલી આ હોસ્પિટલમાં વર્લ્ડ ક્લાસ સુવિધા હોવાનું કહેવાય છે. પરંતુ ઓગસ્ટમાં જ હોસ્પિટલના એક વોર્ડમાં સીલિંગનો કેટલોક ભાગ ધરાશાયી થઈ ગયો હતો. આ ઘટના બી-2 સર્જિકલ વોર્ડથી અમુક ફૂટ દૂર જ બની હતી, ઘટના બાદ સત્તાધિકારીઓને 26 મહિલા દર્દીઓને અન્ય વોર્ડમાં ખસેડવાની ફરજ પડી હતી. જ્યારે હોસ્પિટલના ચીફ એક્ઝિક્યૂટિવ રમ્યા ભટ્ટે કહ્યું કે, સ્ટાફે કરેલો દાવો ખોટો છે. ચારેય ઓપરેશન થીયેટર્સ રેગ્યુલર મેઈન્ટેનન્સ માટે બંધ કરાયા છે. શનિવારથી ઓપરેશન થિયેટર્સ કામ કરતા શરૂ થઈ જશે. તેમણે કહ્યું કે, બધી જ હોસ્પિટલમાં મેઈન્ટેનન્સ કામ કરાતું હોય છે. જોકે દિવાલમાં પાણી લીક થવાની વાત પર તેમણે કહ્યું, બહારની તરફની દિવાલમાં પાણી લીક થવાની ઘટના બની હતી. શુક્રવારે SVP હોસ્પિટલમાં દર્દીના ત્રીજા સગાને પાસ વિના અંદર ન જવા દેતા સિક્યોરિટી ગાર્ડને માર માર્યો હતો. આ ઘટના સીસીટીવી કેમેરામાં કેદ થઈ ગઈ હતી. જેમાં દર્દીનો એક સંબંધી ગાર્ડ સાથે બોલાચાલી થયા બાદ તેને લાકડી મારતા દેખાય છે. સંબંધીઓએ આક્ષેપ કર્યો હતો કે સૌથી પહેલા સિક્યોરિટી ગાર્ડે તેમના પર હુમલો કર્યો હતો. આ સમગ્ર મામલે કોઈપણ પોલીસ ફરિયાદ નોંધવામાં આવી નથી.