અમદાવાદીઓ, બહારના વડાપાંઉ કે રસ ખાતા પહેલા આટલું જાણી લેજો

અમદાવાદ: અમદાવાદીઓ ખાવાના બહારનું શોખીન છે, પરંતુ ઉનાળાની ગરમીમાં તેમને તેમનો આ જ શોખ બીમાર બનાવી રહ્યો છે. હાલમાં જ AMC દ્વારા વિવિધ સ્થળોએથી ફુડ સેમ્પલ લેવાયા હતા, જેમાં શાહીબાગની જયભવાની વડાપાંવ, સેટેલાઈટમાં આવેલા ધ ચોકલેટ રુમ સહિતની જાણીતી જગ્યાઓએથી લેવાયેલા સેમ્પલ પણ ખાવાલાયક ન હોવાનું બહાર આવ્યું છે. ઉનાળાની ગરમી વધવાની સાથે શહેરમાં રોગચાળો પણ વધી રહ્યો છે, ત્યારે કોર્પોરેશનની ફ્લાઈંગ સ્ક્વોડ ટીમે ખાણીપીણીની વિવિધ જગ્યાએથી 500 જેટલા ફુડ સેમ્પલ લીધા હતા. આ તમામ સેમ્પલનું પરિક્ષણ કરાયું હતું, જેમાંથી 47 ફુડ સેમ્પલ ક્વોલિટી ચેકમાં ફેલ થયા છે. કોર્પોરેશનની ટીમે ચોકલેટ, મોનોસોડિયમ ગ્લુટામેટ, રતલામી સેવ, એનર્જી સોફ્ટ ડ્રિંક, ફ્રુટ ફ્લેવર્ડ વોટર, બ્રેડ બન્સ, ટોમાટો સેવ, રેવડી જેવા ખાદ્યપદાર્થોના જોધપુર, સેટેલાઈટ, ચિલોડા, નિકોલ, મ્યુનિસિપલ માર્કેટ તેમજ સીજી રોડ પરથી સેમ્પલ લીધા હતા. જોકે, આ તમામ વસ્તુઓ ખાવાલાયક ન હોવાનું તેના પર કરાયેલા ટેસ્ટના પરિણામથી જાણવા મળ્યું છે. એપ્રિલ મહિનામાં લેવાયેલા આ સેમ્પલોમાં દૂધ, મિક્સ મિલ્ક, સાદુ દૂધ, લવિંગ તેમજ પેશ્ચ્ચુરાઈઝ્ડ દૂધનો પણ સમાવેશ થાય છે, અને આશ્ચર્યજનક રીતે આ વસ્તુઓ પણ ઉતરતી કક્ષાની હોવાનું ધ્યાને આવ્યું છે. હાલમાં જ AMCએ ગોપાલ ડેરી, ગામડીવાલા ડેરી, જનતા ડેરી તેમજ પટેલ ડેરી ફાર્મ જેવી જાણીતી ડેરીના સેમ્પલ પણ લીધા હતા.