ગુજરાતમાં 67 નવી સરકારી શાળાઓ શરૂ કરાશે, છેવાડાના વિદ્યાર્થીઓને પણ થશે લાભ

અમદાવાદ: રાજ્ય સરકાર દ્વારા છેવાડાના ગ્રામ્ય વિસ્તારોમાં રહેતા વિદ્યાર્થીઓને સારી ગુણવત્તાના શિક્ષણ આપવાની યોજનાના પરિણામસ્વરૂપે આ વર્ષે ગુજરાતમાં 67 સરકારી શાળાઓ શરૂ કરવામાં આવશે. શિક્ષણ વિભાગના સૂત્રોએ જણાવ્યું હતું કે, સરકારે 2019-20 માટે 118 શાળાઓને મંજૂરી આપી હતી, પરંતુ કોરોના મહામારીને કારણે આ વર્ષે ફક્ત 67 શાળાઓ શરૂ કરવામાં આવશે.

આ જિલ્લાઓમાં શરૂ થશે સરકારી શાળાઓ
શિક્ષણ વિભાગે તાજેતરમાં જ જિલ્લા કલેક્ટરોને પત્ર લખીને જણાવ્યું છે કે 67 પ્રાથમિક શાળાઓ તાત્કાલિક શરૂ કરી દેવી જોઈએ. જેના માટે માળખાગત વ્યવસ્થા ગોઠવી દેવામાં આવી છે. અમદાવાદ, ધોળકા અને ધોલેરા જેવા જિલ્લામાં હાલની પ્રાથમિક શાળાઓના માળખાકીય સુવિધાનો ઉપયોગ કરીને ત્રણ નવી માધ્યમિક શાળાઓ ચલાવવામાં આવશે. જ્યારે બનાસકાંઠા, ભરૂચ, તળાજા, મહુવા અને ભાવનગરમાં છ શાળાઓ ખોલવામાં આવશે.

ડ્રોપઆઉટ રેટ વધી ગયો હતો
દેવભૂમિ દ્વારકા જિલ્લામાં પાંચ શાળાઓ ખોલવામાં આવશે. છોટા ઉદેપુર, દાહોદ, ડાંગ, પાટણ, મહીસાગર અને પંચમહાલના આદિવાસી વિસ્તારોમાં પણ શાળાઓ ખોલવામાં આવશે. પ્રાથમિક શાળાઓ ઉપરાંત સ્થાનિક ધોરણે કોઈ શૈક્ષણિક સુવિધા ઉપલબ્ધ ન હોવાથી આ ગ્રામીણ વિસ્તારોમાં ડ્રોપઆઉટ રેટ વધી રહ્યો હતો. જોકે, હવે સરકારી શાળાઓ શરૂ થવાને પગલે મોટી સંખ્યામાં વિદ્યાર્થીઓ ફરીથી શિક્ષણ સાથે જોડાઈ શકશે.