કોરોનામાંથી સાજા થયેલા કેટલાંક દર્દીઓમાં આ ઈન્ફેક્શન ફેલાતાં ફફડાટ, 9નાં મોત

અમદાવાદ: કોરોના વાયરસને હરાવ્યા પછી પણ કેટલાંક દર્દીઓમાં તેની સાઈડ ઈફેક્ટ મુસીબત સમાન સાબિત થઈ રહી છે. આવા કેટલાંક ચોંકાવનારા કિસ્સા સામે આવ્યા છે કે જેમાં કોરોનાને હરાવીને સાજા થયેલા દર્દીઓના નાક, કાન અને ગળાની તકલીફોમાં વધારો થયો છે. જ્યારે કેટલાંક દર્દીઓના મોં પર સોજા આવ્યા હોવાના કેસો પણ સામે આવ્યા છે.

અમદાવાદની સિવિલ હોસ્પિટલમાં મ્યુકોરમાઈકોસીસ (ફૂગ સંક્રમણ)ના 44 કેસ સામે આવ્યા છે. જે પૈકી 9 દર્દીઓના મોત થયા છે. કોરોના વાયરસને હરાવીને સાજા થયેલા દર્દીઓમાં આ પ્રકારના લક્ષણો ઘાતક સાબિત થયા હોવાનું જાણવા મળ્યું છે. ડોક્ટરો માટે પણ આ કિસ્સા પડકારરૂપ છે.

પ્રાપ્ત માહિતી મુજબ, ડાયાબિટીસ અને હાઈપર ટેન્શનના દર્દીઓમાં કોરોના મટી ગયા પછી મ્યુકોરમાઈકોસીસ (ફૂગ સંક્રમણ)ની ફરિયાદ વધુ પ્રમાણમાં જોવા મળી રહી છે. કેટલાંક કિસ્સાઓમાં તો આંખનું વિઝન પણ જઈ શકે એ પ્રકારનો ડર સિવિલના એક ડોક્ટરે વ્યક્ત કર્યો છે.

સિવિલ હોસ્પિટલના ઈએનટી વિભાગના ડોક્ટર્સના જણાવ્યા મુજબ મ્યુકોરમાઈકોસીસ (ફૂગ સંક્રમણ)ના કારણે નાકમાં ફંગસ થાય છે અને ફરી તાવ આવે છે. નાકમાં રહેલા હાડકા નબળા પડવા લાગે છે. આ બીમારીના લક્ષણોમાં દર્દીને શરદી, થોડા સમય પછી નાક બંધ થવું, રસી પડવી તેમજ અઠવાડિયા બાદ નાકમાં ગાંઠ થવાનો અહેસાસ થાય છે. જ્યારે આ દર્દી ઈલાજ માટે આવે ત્યારે નાકમાં ગાંઠ જોવા મળે છે, જેનું સિટિ સ્કેન કરાવવું પડે છે. પ્રાપ્ત માહિતી મુજબ, મ્યુકોરમાઈકોસીસ (ફૂગ સંક્રમણ) બીમારી દર્દીઓના શરીરમાં કેન્સર કરતા પણ ઝડપી પ્રસરે છે.

મ્યુકોરમાઈકોસીસ (Mucormycosis) કોને કહેવાય?

ડાયાબિટીસ ધરાવતા દર્દીઓ ખાસ કરીને 50 વર્ષથી વધુ ઉંમરના દર્દીઓમાં કોરોના વાયરસનું સંક્રમણ ફેલાય ત્યારે તેઓને સાયનસનું ઈન્ફેક્શન થાય છે. આ કારણે તે દર્દીનું નાક અથવા આંખનો ભાગ ઈન્ફેક્શનથી સંક્રમિત થઈ ગયો હોવાના કિસ્સા બહાર આવ્યા છે કે જેને મ્યુકોરમાઈકોસીસ (ફૂગ સંક્રમણ) કહેવાય છે. કોરોના વાયરસને હરાવીને સાજા થયેલા પરંતુ અનકંટ્રોલ્ડ ડાયાબિટીસ, કિડની, હાઈપરટેન્શન અને મેદસ્વિતાથી પીડાતા લોકોએ વિશેષ તકેદારી રાખવાની જરૂર છે. આ પ્રકારના દર્દીઓમાં મ્યુકોરમાઈકોસીસ (ફૂગ સંક્રમણ) નામની આ બીમારીનું જોખમ વધું રહેલું છે.