અમદાવાદ: ચંદનચોર વીરપ્પન ગેંગ સાથે સંપર્ક ધરાવતો બોડકદેવનો વેપારી ઝડપાયો

અમદાવાદ: ક્રાઈમબ્રાંચે (ahmedabad crime branch) બાતમીના આધારે ચંદનચોર વીરપ્પન ગેંગ સાથે સંકળાયેલા અને હાથી દાંત વેચવા માટે ફરી રહેલા બોડકદેવના કસ્તુરી કોમ્પ્લેક્સમાં રહેતા પ્રકાશ નામના વ્યક્તિ અને તેના સાગરિતોને રૂપિયા 35 લાખના હાથી દાંતના જથ્થા સાથે ઝડપી લીધા હતા. પોલીસને આરોપી ચંદનચોર વીરપ્પન ગેંગ સાથે સંકળાયેલો હોવાની વિગતો મળતા ક્રાઈમબ્રાંચના ડીસીપીએ તમિલનાડુ પોલીસ અને ફોરેસ્ટ વિભાગને આરોપી બાબતે જાણ કરી હતી. અમદાવાદ ક્રાઈમ બ્રાન્ચે દોઢેક માસ અગાઉ એક હાથી દાંત સાથે પકડેલા આરોપી પ્રકાશ જૈન નામના વેપારીની ફરી અટકાયત કરી છે. આ વખતે તમિલનાડુ ફોરેસ્ટ વિભાગે નોંધેલી ફરિયાદ કેસમાં આરોપી પ્રકાશ જૈનની ધરપકડ કરવામાં આવી છે.

undefined
આ બનાવને પગલે ફોરેસ્ટ વિભાગની ટીમે અમદાવાદ પહોંચીને ઘટસ્ફોટ કર્યો હતો કે તેમણે તમિલનાડુના તિરૂચિરાપલ્લી રેન્જ, ત્રિચીમાંથી વાઘનું ચામડું, બે હાથી દાંત, બે હરણના શિંગડા અને શિયાળની પૂંછ વગેરે જપ્ત કરી કેટલાંક આરોપીઓને ઝડપી લીધા હતા. ફોરેસ્ટ વિભાગની તપાસમાં ખુલેલી વિગતો મુજબ, પકડાયેલા આરોપીઓ ચંદનચોર વીરપ્પન ગેંગ તેમજ અમદાવાદના વેપારી પ્રકાશ જૈન સાથે સંકળાયેલા હતા. આ તસ્કરીમાં પ્રકાશ જૈન મુખ્ય સૂત્રધાર હોવાની વિગતો મળી હતી.

તમિલનાડુ ફોરેસ્ટ વિભાગની માહિતીના આધારે ક્રાઈમબ્રાંચે પ્રકાશને ઝડપી લીધો હતો. પોલીસ તપાસમાં ખુલેલી વિગતો મુજબ, આરોપી પ્રકાશ જંગલી પ્રાણીઓના ચામડા, શિંગડા, દાંતની આંતરરાષ્ટ્રીય તસ્કરી કરતી ટોળકીનો એજન્ટ છે. અગાઉ તે તમિલનાડુના શેલમ વિસ્તારમાં રહેતો હતો. તે સમયે વીરપ્પન ગામ કોલતુરમાં અવારનવાર આવતો જતો રહેતો હતો. મળતી માહિતી મુજબ, પ્રકાશ જૈન વર્ષ 1992થી 2006ના સમયગાળા દરમિયાન તમિલનાડુના સેલમ વિસ્તારમાં દરજી કામ કરતો હતો. દરમિયાન તેનો સંપર્ક જંગલી પ્રાણીઓના ચામડા અને હાથી દાંતની તસ્કરી કરતા લોકો સાથે થયો હતો. બાદમાં તે પ્રાણીઓના ચામડા, હાથીદાંતની તસ્કરી કરતા આંતરરાષ્ટ્રીય એજન્ટ બની ગયો હતો.