અમદાવાદી વ્યોમ મહામુંકરની એપિક નોવેલ 'The Eternal’s Gambit'નું વિમોચન કરાયું

અમદાવાદ: ધ લોર્ડ ઓફ ધ રિંગ્સ, ધ હોબિટ કે પછી હેરી પોટરના ચાહકોની સંખ્યા તો કરોડોમાં છે અને આ જ પ્રકારની એક એપિક નોવેલનું સર્જન અમદાવાદના એક યુવા લેખકે કર્યું છે. હાલમાં જ અમદાવાદ ખાતે વ્યોમ મહામુંકર (vyom mahamunkar)ની પ્રથમ નોવેલ 'The Eternal’s Gambit'નું વિમોચન કરવામાં આવ્યું હતું. અમદાવાદ સ્થિત ક્રોસવર્ડ દ્વારા આ પુસ્તકનું પ્રકાશન કરવામાં આવ્યું છે. ફિલ્મ ડિરેક્ટર મનિષ સૈની, ગુજરાતના જાણીતા નાટ્યકાર કબીર ઠાકોર અને 'કેવી રીતે જઈશ' તેમજ 'બે યાર' ફેમ ગુજરાતી ફિલ્મ ડિરેક્ટર અભિષેક જૈન આ પુસ્તક વિમોચનમાં ઉપસ્થિત રહ્યા હતા.
લેખક વ્યોમ મહામુંકરનો જન્મ અને ઉછેર અમદાવાદમાં થયો છે. એક સૈન્ય અધિકારીના પુત્ર તરીકે તેઓને અનેક સ્થળોએ પ્રવાસ કરવાની તક મળી, જેણે તેમના રચનાત્મક વર્ષો દરમિયાન ઇતિહાસ અને સંસ્કૃતિમાં રસ જગાડ્યો. તેમની માતા એક ઓર્થોડોન્ટિસ્ટ અને કલાકાર છે અને તેમણે તેની સર્જનાત્મક શોધને માર્ગદર્શન આપ્યું છે. નાનપણથી વ્યોમ સાયન્સ ફિક્શન તરફ આકર્ષિત છે. વ્યોમ એક ભૂતપૂર્વ ડિઝાઇન વિદ્યાર્થી છે અને હાલમાં વ્હિસલિંગ વુડ્સ ઇન્ટરનેશનલ ખાતે ફિલ્મ એડિટિંગમાં ડિગ્રી મેળવી રહ્યો છે.વ્યોમ મહામુંકરે જણાવ્યું હતું કે, “મારા વડદાદી મને રામાયણ અને મહાભારતની કથાઓ કહેતા હતા અને મારા દાદીએ મને વિશ્વ સાહિત્યની વાર્તાઓ કહી અને તેના કારણે બાળપણથી વાર્તાઓ અને તેમાં પણ પૌરાણિક વાર્તાઓ સાથે મારું જોડાણ થયું અને મારી માતા એક કલાકાર હોવાના કારણે મને અલગ દ્રષ્ટિકોણ પણ પ્રાપ્ત થયો. ત્યારબાદ હોલિવુડ ફિલ્મ ટ્રોયના કારણે હું ઇલિયડ-ઓડિસી તરફ આકર્ષાયો. વિશ્વના અલગ-અલગ પોરાણિક પાત્રો અને કહાનીઓ મારા મનમાં સતત રમતા રહેતા અને એ જ કારણે એક અલગ જ પ્રકારની એપિક સ્ટોરીનો પ્લોટ મારા મનમાં ઘડાયો. મેં ઇંગ્લેન્ડની મુલાકાત લીધી અને તેને સંલગ્ન એપિક નોવેલની રચના કરી છે.”