અમદાવાદના કોવિડ કેર સેન્ટરમાં કોરોના પોઝિટિવ દર્દીના રૂમમાંથી મળી આવી દારૂની બોટલ

અમદાવાદ: જ્યાં એક બાજુ અમદાવાદમાં કોરોના વાયરસના કેસમાં વધારો થઈ રહ્યો છે ત્યાં બીજી બાજુ શહેરના બોડકદેવ કોવિડ કેર સેન્ટરમાં કોરોના પોઝિટિવ દર્દીના રૂમમાંથી દારૂની બોટલ મળી આવી હોવાનું જાણવા મળ્યું છે. આ કેસમાં હવે બોડકદેવ કોવિડ કેર સેન્ટરમાં કોરોનાના દર્દી સહિત 2 વ્યક્તિ સામે ફરિયાદ નોંધાઈ છે. દારૂની બોટલ મળી આવતા વસ્ત્રાપુર પોલીસે બંને સામે ગુનો નોંધી કાર્યવાહી હાથ ધરી છે.

શહેરના બોડકદેવ વિસ્તારમાં આવેલી અને અમદાવાદ મ્યુનિસિપલ કોર્પોરેશન (AMC)એ કોવિડ કેર સેન્ટર તરીકે જાહેર કરેલી હોટલ જીંજરમાં કોરોનાના દર્દી પાસેથી વસ્ત્રાપુર પોલીસે દારૂની એક બોટલ જપ્ત કરી છે. વધુમાં કોવિડ કેર સેન્ટર તરીકે જાહેર કરેલી આ હોટલ જીંજરમાં કોરોનાના દર્દી સાથે તેનો મિત્ર પણ મળી આવ્યો છે જે નેગેટિવ હોવાનું જાણવા મળ્યું છે.

પોલીસના જણાવ્યા મુજબ અમે બોડકદેવની હોટલ જીંજર કોવિડ સેન્ટર છે કે કેમ તે અંગેની તપાસ કરી રહ્યા છીએ અને કોરોનાનો જે દર્દી હતો તેની સાથે તેનો મિત્ર ક્યાંથી આવ્યો વગેરે તપાસ પણ કરવામાં આવી રહી છે. 15મી ઓગસ્ટને ધ્યાનમાં રાખતા વસ્ત્રાપુર પોલીસ સ્ટાફ રાત્રે તે વિસ્તારમાં આવેલી હોટેલમાં ચેકિંગ કરી રહ્યો હતો. ત્યારે બોડકદેવ વિસ્તારમાં આવેલી હોટલ જીંજરમાં રૂમ તપાસ કરતા એક રૂમમાં બે યુવક હાજર હતા અને બેડ પર દારૂની બોટલ મળી આવી હતી.