સોશિયલ મીડિયાથી સંપર્કમાં આવેલા યુવકો ધોરણ 10ની સગીરાને આબુ લઈ ગયા, પોલીસે છોડાવી

અમદાવાદ: સ્કૂલમાં અભ્યાસ કરતા હોય અને મોબાઈલ-ઈન્ટરનેટનો વધુ ઉપયોગ કરતા હોય તેવા સંતાનોના માતા-પિતા માટે આ કિસ્સો ચેતવણીરૂપ છે. જ્યાં એકબાજુ કોરોનાની મહામારીના કારણે શાળા-કોલેજો બંધ છે ત્યાં બીજી બાજુ ઘરમાં રહીને ઓનલાઈન અભ્યાસ કરતા વિદ્યાર્થીઓમાં મોબાઈલ-ઈન્ટરનેટનો વપરાશ વધ્યો છે. ત્યારે અમદાવાદનો એક એવો ચોંકાવનારો કિસ્સો પ્રકાશમાં આવ્યો છે કે જેમાં ધોરણ 10માં અભ્યાસ કરતી સગીરા સાથે સોશિયલ મીડિયા એપ પર સંપર્કમાં આવેલા 4 શખસ તેને ભોળવીને માઉન્ટ આબુ લઈ ગયા હતા. સગીરાના પરિવારે આ અંગે ફરિયાદ કરતા પોલીસ આબુ જઈને તમામને અમદાવાદ લઈ આવી છે.

પ્રાપ્ત માહિતી મુજબ, અમદાવાદની ધોરણ 10માં અભ્યાસ કરતી સગીરા સોશિયલ મીડિયા એપ્લિકેશન સ્નેપ ચેટના માધ્યમથી 4 લોકોના સંપર્કમાં આવી હતી. ત્યારબાદ આ સગીરાની એક યુવકની સાથે મેસેજથી વાતો થઈ હતી. ત્યારે આ સગીરાને આબુ આવવા માટેનું જણાવવામાં આવતા તે તૈયાર થઈ ગઈ હતી. ગુરુવારે મોડી રાત્રે સગીરાના ઘરે બે લોકો ગાડી લઈને પહોંચી ગયા હતા અને તેઓની સાથે બે કિશોર પણ હતા. તેઓ આ સગીરાને ફોસલાવીને માઉન્ટ આબુ લઈ ગયા હતા. બાદમાં દીકરીને અજાણ્યા શખસ લલચાવી-ફોસલાવીને લઈ ગયા હોવાની સગીરાના પરિવારે ફરિયાદ નોંધાવી હતી.

ગુજરાત યુનિવર્સિટી પોલીસમાં નોંધાયેલી ફરિયાદ બાદ પોલીસે સીસીટીવી ફૂટેજ મેળવીને તપાસ શરૂ કરી હતી. શંકાસ્પદ વાહનના આધારે તપાસ કરતા આ સગીરા અન્ય 4 લોકોની સાથે ફરવા ગઈ હોવાનું તપાસમાં સામે આવ્યું હતું. પોલીસે માઉન્ટ આબુ જઈને ત્યાંથી સગીરા અને બે શખસ (યશ બારોટ અને નિલય શાહ) તથા બે કિશોરને ઝડપી પાડ્યા હતા. પોલીસે સગીરા અને ચાર યુવકોના મેડિકલ રિપોર્ટ કરાવ્યા હતા. યશ બારોટ અને નિલય શાહ નામના બે શખસને પોલીસે પકડી પાડ્યા છે અને તેઓ કોલેજમાં અભ્યાસ કરી રહ્યા હોવાનું જાણવા મળ્યું છે.