મંજૂરી વિના ફોટોનો ઉપયોગ કર્યો, 'પ્રતિજ્ઞા' ફેમ એક્ટ્રેસને ₹5 લાખ ચૂકવશે રાજસ્થાનની કંપની

અમદાવાદ: શહેરની સિવિલ કોર્ટે રાજસ્થાનના મહેંદી ઉત્પાદકને પાંચ લાખ રૂપિયાનું વળતર અમદાવાદની એક્ટ્રેસ પૂજા ગોરને ચૂકવવાનો આદેશ આપ્યો છે. મહેંદી ઉત્પાદકે પોતાની પ્રોડક્ટના લેબલ પર એક્ટ્રેસની મંજૂરી વિના તેના ફોટોગ્રાફનો ઉપયોગ કર્યો હતો. પૂજાએ રાજસ્થાનના કનક પ્રોડક્ટ્સ સામે કેસ કર્યો હતો. તેઓ 'પ્રતિજ્ઞા' લેબલ હેઠળ પૂજાની તસવીરનો ઉપયોગ કરીને મહેંદી વેચતા હતા.

પૂજાને 2011માં આ વિશે જાણ થતાં તેણે કોપીરાઈટ ભંગનો કેસ દાખલ કર્યો હતો અને નુકસાન પેટે 20 લાખ રૂપિયા 18 ટકા વ્યાજ સાથે માગ્યા હતા. પૂજાએ કોર્ટમાં જણાવ્યું કે, ટીવી સીરિયલ 'મન કી આવાઝ-પ્રતિજ્ઞા' દ્વારા તેને પ્રસિદ્ધિ મળી હતી. લોકોમાં 'પ્રતિજ્ઞા' તરીકે જાણીતી છે. કનક પ્રોડક્ટ્સનું આ વર્તન છેતરપિંડી છે. સાથે જ તેના ફોટોગ્રાફના કોપીરાઈટનું ઉલ્લંઘન છે તેમ જણાવ્યું.

પૂજાએ કહ્યું, શરમ વિના તેની તસવીરની પાઈરસી કરવામાં આવી અને આ તેની ગુડવિલ અને પ્રતિષ્ઠા પર હુમલો છે. કંપનીએ તેની તસવીરનો ઉપયોગ મંજૂરી વિના કર્યો, જે કોપીરાઈટ એક્ટ અને કોમન લૉ હેઠળ ગેરકાયદે છે. કોર્ટમાં રજૂઆત કરવામાં આવી કે, પૂજા ગોર પોતાની તસવીરની કાયદેસરની માલિક છે. માટે તે કોઈપણ વ્યક્તિ, કંપની કે ફર્મને કોઈપણ પ્રકારના કોપીરાઈટ ભંગ કરતા અટકાવી છે.

પૂજા ગોરે કરેલા કેસનો ચુકાદો 9 વર્ષ બાદ આવ્યો છે. કોર્ટે પૂજાની દલીલ સ્વીકારી છે પરંતુ કહ્યું કે, તેણી વિવાદિત લેબલના વેચાણનો ઓન રેકોર્ડ પુરાવો રજૂ કરી શકી નથી. માટે તેને કુલ નુકસાન કેટલું થયું તેની ગણતરી કરવી મુશ્કેલ છે. જો કે, કોપીરાઈટ એક્ટના ઉલ્લંઘન બદલ કોર્ટે કંપનીને 5 લાખ રૂપિયા વળતર 6 ટકા વ્યાજ સાથે ચૂકવવાનું કહ્યું છે. 2011થી વ્યાજની ગણતરી કરવાની રહેશે. સાથે જ કોર્ટે કંપનીને આદેશ આપ્યો કે, તેની પ્રોડક્ટ પર પૂજાની તસવીરનો ઉપયોગ ના કરે.