લિવ-ઈનમાં રહેતી સુરતની યુવતી પ્રેગ્નેટ થતા અમદાવાદના પ્રેમીએ તરછોડી, અભયમે કરી મદદ

અમદાવાદઃ સુરતની એક યુવતીનું અમદાવાદના સોનોગ્રાફી સેન્ટરમાંથી 2જી ફેબ્રુઆરીએ અભયમ 181ની ટીમ દ્વારા રેસ્ક્યુ કરવામાં આવ્યું હતું. હેલ્પ લાઈનના અધિકારીઓના જણાવ્યા મુજબ, યુવતીને તેના બોયફ્રેન્ડ દ્વારા એકવાર હોસ્પિટલમાંથી બહાર નીકળ્યા બાદ ખરાબ પરિણામ ભોગવવાની ધમકી આપવામાં આવી હતી.

હેલ્પલાઈનના અધિકારીએ જણાવ્યું હતું કે, આ યુવતી અમદાવાદના એક યુવક સાથે રિલેશનશીપમાં હતી, અને તેને લગ્નનું વચન આપ્યું હતું. બંને વચ્ચે શારીરિક સંબંધો બંધાયા અને યુવતી પ્રેગ્નેટ થઈ ગઈ. આ બાદ યુવકે તેની સાથે વાત કરવાનું અને કોલ રિસીવ કરવાનું બંધ કરી દીધું હતું.

યુવતીના માતા-પિતાને દીકરીના પ્રેગ્નેન્સી વિશે માલુમ ન હોઈ યુવતી સીધા જ અમદાવાદ પહોંચી ગઈ હતી અને અહીંથી તેણે પ્રેમીને ફોન કરીને મળવા માટે બોલાવ્યો હતો. પરંતુ આ પહેલા તેણે પોતાનો પ્રેગ્નેન્સી ટેસ્ટ કરાવવાનું નક્કી કર્યું હતું.

કાઉન્સેલરે કહ્યું કે, જ્યારે યુવકને પ્રેગ્નેન્સી વિશે જાણ થઈ, તેણે ત્યાં પહોંચીને યુવતીને લાફો મારી દીધો. યુવતી હોસ્પિટલમાં જઈને સોનોગ્રાફી ટેસ્ટ કરાવવા ઈચ્છતી હતી, જેના પર યુવકે તેને હોસ્પિટલમાંથી બહાર નીકળતા પેટમાં છરી મારવાની ધમકી આપી દીધી હતી. આ બાદ મહિલાએ હેલ્પલાઈનને ફોન કર્યો હતો અને મદદ માગી હતી.

યુવતીનો ફોન આવતા જ પોલીસ તથા અભયમની ટીમ ઘટના સ્થળે પહોંચી ગઈ અને ત્યાંથી યુવતીને બસ સ્ટેન્ડ લઈ જઈને સુરત પરત મોકલી દીધી હતી. જ્યારે બુધવારની એક ઘટનામાં અભયમની ટીમે ચાંગોદર વિસ્તારમાંથી એક મહિલાનો પોતાના બાળક સાથે મિલાપ કરાવી આપ્યો હતો.