હિરેન ઉપાધ્યાય, અમદાવાદ: કાયદા પ્રજા માટે જ હોય છે? તેના રક્ષકો માટે નહીં? સામાન્ય નાગરિક જરા સરખી ભૂલ કરે તો કાયદાનો ડંડો બતાવતી પોલીસ પોતે બેફામ કાયદાનો ભંગ કરી રહી છે. અમદાવાદમાં જ હાલ ફેન્સી નંબર પ્લેટ સામે પોલીસે અભિયાન શરુ કર્યું છે, જ્યારે બીજી તરફ ખુદ કેટલાક પોલીસ સ્ટાફના વાહનોમાં જ ફેન્સી નંબર પ્લેટો લાગેલી છે, અને તેમની સામે કોઈ પગલાં નથી લેવાતા.
પોલીસને નિયમ લાગુ નથી પડતો?
અમદાવાદમાં ટ્રાફિક પોલીસે જેમના વાહનોમાં નંબર પ્લેટ ન હોય કે ફેન્સી નંબર પ્લેટ લાગેલી હોય તેમની સામે મોટાપાયે કાર્યવાહી શરુ કરી છે. આવા લોકોને બે હજાર રુપિયાનો આકરો દંડ ફટકારવામાં આવી રહ્યો છે. જોકે, ખુદ કેટલાક પોલીસ કર્મચારીઓ જાણે આ કાયદો પોતાના પર લાગુ ન પડતો હોય તેમ તેનો બિન્ધાસ્ત ભંગ કરી રહ્યા છે.
પોલીસનું લાલ અને વાદળી સ્ટીકર
મોટાભાગના પોલીસ કર્મચારીઓના વાહન પર લાલ અને વાદળી રંગનું સ્ટિકર લગાવેલું હોય છે, જે બતાવે છે કે, તેઓ પોલીસ કર્મચારી છે, અને તેમના પર ટ્રાફિકના કોઈ નિયમ લાગુ નથી પડતા. સિગ્નલો પર ઉભેલા ટ્રાફિક પોલીસના કર્મચારીઓ પણ આ સ્ટિકરને ઓળખી જાય છે, અને આવા લોકોએ ભલે હેલ્મેટ ન પહેર્યું હોય કે તેમના વાહનમાં ફેન્સી નંબર પ્લેટ લાગેલી હોય, તેમને કશુંય થતું નથી.
ટ્રાફિક ડીસીપી શું કહે છે?
સામાન્ય નાગરિકોએ આ અંગે ટ્રાફિક ડીસીપીને અઢળક ફરિયાદો કરતા 8 જાન્યુઆરીએ તેમણે દરેક પોલીસ સ્ટેશનને પત્ર લખ્યો હતો, જેમાં જણાવ્યું હતું કે, દરેક પોલીસકર્મી માટે ટ્રાફિકના નિયમોનું પાલન કરવું ફરજિયાત છે, જેમાં પ્રાઈવેટ વાહન ચલાવતી વખતે પણ હેલ્મેટ પહેરવું, સીટ બેલ્ટ બાંધવાથી લઈને વાહનમાં સ્ટાન્ડર્ડ નંબર પ્લેટ હોવી પણ જરુરી છે.
મોટાભાગના પોલીસકર્મીના વાહનમાં ફેન્સી નંબર પ્લેટ
જોકે, અમારા સાથી અખબાર અમદાવાદ મિરરે આ અંગે જ્યારે કેટલાક પોલીસ સ્ટેશનોમાં તપાસ કરી તો જાણવા મળ્યું કે, મોટાભાગના પોલીસ કર્મચારીઓના વાહનોમાં ફેન્સી નંબર પ્લેટ લાગેલી છે. મિરરે સેટેલાઈટ, સોલા, સરખેજ, વેજલપુર અને નારણપુરા પોલીસ સ્ટેશન ઉપરાંત અમદાવાદ પોલીસ કમિશનર ઓફિસમાં પણ તપાસ કરી, અને તમામ જગ્યાએ અનેક પોલીસ કર્મચારીઓ ખુદ ટ્રાફિકના નિયમો તોડતા નજરે પડ્યા.
7474 અને 2929 નંબર પોલીસના ફેવરિટ
મિરરને આ તપાસ દરમિયાન જાણવા મળ્યું કે, દસમાંથી સાત પોલીસ કર્મચારીઓના વાહન પર નિયમ વિરુદ્ધ રેડ એન્ડ બ્લૂ સ્ટિકર લાગેલું છે. અનેક વાહનોમાં ફેન્સી નંબર પ્લેટ લાગેલી છે. જેમ કે, 7474 નંબરને એવી રીતે લખાવાયો છે કે, ઝાલા લખેલું હોય તેવું લાગે, તેવી જ રીતે 2929 નંબર પણ પોલીસકર્મીઓનો ફેવરિટ છે, કારણકે તેનાથી પણ ‘ઝાલા’ લખાવી શકાય છે.
ટ્રાફિક પોલીસ પણ સ્વીકારે છે
ખુદ ટ્રાફિક પોલીસકર્મીઓ સ્વીકારે છે કે, તેઓ કોઈ વાહન પર આ સ્ટિકલ લગાડેલું જુએ ત્યારે સમજી જાય છે કે, વાહનચાલક પોલીસ કર્મચારી છે અને તેમને તેઓ રોકતા નથી. ઘણી વાર તો પોલીસ કર્મચારીઓના સંબંધીઓ પણ પોલીસનું સ્ટિકલ લગાવીને ફરતા હોય છે.
કોન્સ્ટેબલના ત્રણેય બાઈકમાં ફેન્સી નંબર પ્લેટ
પોલીસ કમિશનર ઓફિસના એક કોન્સ્ટેબલના જણાવ્યા અનુસાર, તેની પાસે ત્રણ બાઈક છે, અને ત્રણેયમાં તેણે પોલીસનું સ્ટિકલ લગાવેલું છે. તેણે બાઈક લીધું તે વખતે HSRPનો નિયમ નહોતો, માટે તેણે ખાસ ડિઝાઈનની નંબર પ્લેટ બનાવડાવી હતી, પણ હવે HSRP ફરજિયાત થઈ જતા તે પોતાની જુની નંબર પ્લેટ કઢાવી HSRP નખાવી દેશે.
કાયદાનું પાલન પોલીસની પણ ફરજ છે
ટ્રાફિક ડીસીપી સુધીર દેસાઈનું કહેવું છે કે, આ અંગે અમે સિનિયર પોલીસ અધિકારીઓને પણ વાત કરી છે. જો પોલીસ પબ્લિક પાસે કાયદાનું પાલન કરાવતી હોય તો તેણે પહેલા કાયદાનું પાલન કરવું જોઈએ. દરેક પોલીસકર્મીની ફરજ છે કે તે ફેન્સી નંબર પ્લેટ ન નખાવે, સીટ બેલ્ટ લગાવે અને હેલ્મેટ પહેરે તેમજ ટ્રાફિકના અન્ય નિયમોનું પાલન કરે.
હવે HSRP ફરજિયાત છે
વસ્ત્રાપુર પોલીસ સ્ટેશનના ઈન્સપેક્ટરે મિરરને જણાવ્યું હતું કે, અમને ટ્રાફિક વિભાગ તરફથી આ અંગેનો પત્ર મળ્યો છે. વસ્ત્રાપુર પોલીસ સ્ટેશનના દરેક કર્મચારીને ટ્રાફિકના નિયમોનું ચુસ્ત પાલન કરવા માટે સૂચના આપી દેવાઈ છે. અમદાવાદ આરટીઓ જીએસ પરમારે આ અંગે જણાવ્યું હતું કે, ફેન્સી નંબર પ્લેટો હિટ એન્ડ રનના કિસ્સામાં ઝડપથી ઓળખાતી ન હોવાથી ગુનેગાર છટકી જાય છે, પરંતુ હવે દરેક વાહનમાં HSRP ફરજિયાત છે.
નવરંગ સેન 2013થી ટાઈમ્સ ગ્રુપ સાથે સંકળાયેલા છે. ડિજિટલ જર્નાલિઝમમાં 14 વર્ષનો અનુભવ ધરાવતા નવરંગ સેને અગાઉ દિવ્ય ભાસ્કર તેમજ GSTVમાં કામ કર્યું છે. અર્થકારણ, રાજકારણ તેમજ ટેક્નોલોજી અને ઓટોમોબાઈલ તેમના રસના વિષય છે.... વધુ વાંચો
We use cookies and other tracking technologies to provide services in line with the preferences you reveal while browsing the Website to show personalize content and targeted ads, analyze site traffic, and understand where our audience is coming from in order to improve your browsing experience on our Website. By continuing to browse this Website, you consent to the use of these cookies. If you wish to object such processing, please read the instructions described in our privacy policy/cookie policy.