અમદાવાદઃ સસ્તામાં સોનું અને ડૉલર આપવાની લાલચે જબરો ખેલ પાડતો હતો, પોલીસે પકડી લીધો

લોભિયા હોય ત્યાં ધૂતારા ભૂખ્યા ના મરે.. એ કહેવત પ્રમાણે ઘણાં ઝડપથી રૂપિયાવાળા બનવામાં છેતરપિંડીનો ભોગ બનતા હોય છે. ટૂંક સમયમાં રૂપિયાવાળા બનવું હોય જલદી રૂપિયા કમાઈ લેવા હોય તેવી લાલચમાં ફસાવીને ગેંગ લોકોને છેતરતી હોય છે. આ જ રીતે છેતરપિંડી કરતા એક શખ્સની અમદાવાદ ક્રાઈમ બ્રાન્ચે ધરપકડ કરી છે. ક્રાઈમ બ્રાન્ચે ઈસનપુરમાં રહેતા 34 વર્ષના કિર્તિ અમીનની ધરપકડ કરી છે. જેણે લોકોને સોનું અને ડૉલર સસ્તા ભાવે આપવાની લાલચે છેતરપિંડી કરી હતી. પોલીસના જણાવ્યા પ્રમાણે કિર્તિએ ગુજરાત, રાજસ્થાન અને મહારાષ્ટ્રના ઓછામાં ઓછા 10 લોકો સાથે છેતરપિંડી કરી છે. ક્રાઈમ બ્રાન્ચ દ્વારા હવે આ કેસમાં વધુ ઊંડી તપાસ કરવામાં આવી રહી છે.

મણિનગરના રામબાગ ચાર રસ્તાથી પોલીસે તેમની ધરપકડ કરી છે. શનિવારે આ અંગે પોલીસે જણાવ્યું કિર્તિ અમિન અને તેની ગેંગના સભ્યો લોકોને અસલી સોનું અને ડૉલર બતાવીનને તેને નીચી કિંમતે આપવાની વાત કરતા હતા.

ગેંગ છેતરપિંડી કરીને ગજબ પ્લાન બનાવતી હતી
જો કોઈ સોનું કે ડૉલર લેવા માગે તો તે વ્યક્તિ પાસેથી કિર્તિ અમિનની ગેંગ એડવાન્સમાં રૂપિયા લઈ લેતી હતી અને આ પછી ગેંગનો જ એક વ્યક્તિ નકલી પોલીસ બનીને આવતો હતો અને બન્ને પક્ષોને ડરાવીને ભારત સરકારના નિયમોનું ઉલ્લંઘન કરવામાં આવતું હોવાનું કહીને તેમની સામે પોલીસ કેસ નોંધવાની ધમકી આપવામાં આવતી હતી. આ પછી નકલી પોલીસ બનીને આવેલી વ્યક્તિ ત્યાંથી ફરાર થઈ જતી હતી અને બન્ને પક્ષ પાસેથી રૂપિયા લઈ જતી હતી.

કિર્તિ અમિન અને તેની ગેંગ લોકોને નકલી ડૉલર અને ગોલ્ડ આપીને છેતરપિંડી પણ કરતી હતી. પાછલા એક વર્ષમાં આ ગેંગ મહારાષ્ટ્ર, રાજસ્થાન અને સૌરાષ્ટ્ર, નડિયાદ તથા અમદાવાદ અને ગુજરાતના અન્ય ભાગોના લોકોને છેતરતા હતા.

મુંબઈ-રાજસ્થાનમાં પણ રખાતા હતા હતા સંપર્ક
ક્રાઈમ બ્રાન્ચ અધિકારીએ જણાવ્યું કે બે મહિના પહેલા કિર્તિ અમિન, રાજસ્થાનનો શાહરુુખ પટેલ અને મુંબઈનો બાબા ખાન રાજસ્થાનમાં નકલી સોનું મોકલતા હતા. કિર્તિ અમદાવાદમાં ડીલ માટે ફોન કરતો હતો. આ ગેંગના સભ્યો લોકોને હાથિજણ વિસ્તારમાં મળતા હતા. એ સમયે કિર્તિ અમિનને શક હતો કે રાજસ્થાનની વ્યક્તિ રાજસ્થાન પોલીસ સાથે આવી છે, માટે તે ત્યાંથી ફરાર થઈ ગયો હતો.

આ પછી રાજસ્થાનની બાડમેર પોલીસે ફરિયાદ ફરિયાદ નોંધીને તપાસ કરી હતી. પોલીસે જણાવ્યું કે થોડા સમય માટે કિર્તિ અમિને મોડાસા મામલતદાર ઓફિસમાં પણ કામ કર્યું છે. તેણે ખોટી રીતે 'માં' કાર્ડ પણ બનાવ્યું છે અને ખોટા ફિંગરપ્રિન્ટનો ઉપયોગ કર્યો છે. તે 2019માં નકલી પોલીસવાળા તરીકે પણ પકડાયો હતો.