જાણવા મળ્યા મુજબ, ઘાટલોડિયામાં રહેતા મેરુ દેસાઈ અને અમી દેસાઈ વચ્ચે 2019થી પ્રેમ સંબંધ હતો. અમીના પરિવારને આ સંબંધનો સ્વીકાર કરવા તૈયાર ન હતો. જેથી અમીએ પિતાનું ઘર છોડી પ્રેમી સાથે રહેવાનો નિર્ણય કર્યો અને બંને લિવ ઈનમાં રહેવા લાગ્યા હતા. બંનેએ ઘાટલોડિયાની આશાપુરા સોસાયટીમાં લિવ ઈનમાં રહેવાનું શરૂ કર્યું હતું. આ વાતની જાણ અમીને પરિવારને થતાં તેઓ ટોળું લઈને ત્યાં પહોંચી ગયા હતા. યુવકના જણાવ્યા મુજબ, પહેલા એ લોકોએ સમાધાનના બહાને 51 લાખ રૂપિયાની માગણી કરી હતી અને ધમકી આપી હતી કે જો તેમ નહીં કરવામાં આવે તો અમીનું અપહરણ કરી લેવાશે. યુવકના પરિવારે તેમની માગણી ન સ્વીકારતા ટોળાએ સોસાયટીમાં તોડફોડ શરૂ કરી દીધી હતી.
એમી દેસાઈ પીએચડી કરી રહી છે અને ગાંધીનગર ચિલ્ડ્રન યુનિવર્સિટીમાં સંશોધન મદદનીશ તરીકે ફરજ બજાવતી હોવાનું અને મેરુ લોનો અભ્યાસ કરતો હોવાનું જાણવા મળ્યું છે. અમીના બાળપણમાં જ લગ્ન કરી દેવાયા હતા. જે તેને મંજૂર ન હતા. દરમિયાનમાં મેરુ સાથે પ્રેમ સંબંધ બંધાતા તેણે તેની સાથે જીવન વિતાવવાનો નિર્ણય લીધો હતો અને તેની સાથે લિવ ઈનમાં રહેવા આવી ગઈ હતી.
અમી અને મેરુએ તેમને રક્ષણ પુરું પાડવા માટે રાજ્યના ગૃહ મંત્રી હર્ષ સંઘવીને અપીલ કરી છે. આ કપલ 51 લાખ રૂપિયા અને સોનાના દાગીના આપવાના રિવાજનો વિરોધ કરી રહ્યું છે અને પોતાનું જીવન પોતાની મરજી મુજબ જીવવા માગે છે. હાલ તો ઘાટલોડિયા પોલીસે હુમલો અને તોડફોડ કરનારા શખસો સામે રોયોટિંગનો ગુનો નોંધી વધુ તપાસ હાથ ધરી છે.