અમદાવાદ: વટવામાં સમૂહલગ્નના આયોજકની મળી લાશ

અમદાવાદઃ શહેરના વટવા વિસ્તારામાં આવેલી સૈયદવાડીમાં ગત રવિવારે સમૂહ લગ્નનું આયોજન કરવામાં આવ્યું હતું. જેમાં આવેલા મહેમાનો દ્વારા દહેજમાં આપવા લવાયેલી ચીજ-વસ્તુઓની લૂંટફાટ મચાવવામાં આવી હતી. આ પછી સમૂહ લગ્નના આયોજક રફીક છિપા લાપતા હતા. આજે સવારે જમાલપુર બ્રિજ નીચેથી સાબરમતી નદીમાંથી તેમની લાશ મળી આવી હતી. ફાયરબ્રિગેડને કોઈ યુવકે નદીમાં ઝંપલાવ્યું હોવાનો કોલ મળતા તેમણે રફીકની લાશ બહાર કાઢી હતી. લાશ બહાર કાઢ્યા પછી તપાસ કરતાં આ મૃતદેહ વટવામાં સમૂહ લગ્નનું આયોજન કરનાર રફીક છિપાનો હોવાનું જાણવા મળ્યું હતું.


(સમૂહલગ્નના આયોજક રફીક છીપાએ નદીમાં કૂદી કરી લીધો આપઘાત)

રવિવારે વટવાની સૈયદવાડીમાં મુસ્લિમ સમાજનો એક સમૂહનિકાહ (લગ્ન)નો કાર્યક્રમ હતો. જેમાં 80 યુગલના સમૂહલગ્ન યોજાયા હતા. જેવા લગ્ન પત્યા કે ત્યાં હાજર મહેમાનો યુવતીઓને આપવા માટે રાખેલો દહેજનો સામાન જેવો કે ડબલ બેડ, ગાદલા, ઓશિકા, રસોડાનો વાસણ સેટ, ખુરશી-ટેબલ પહેલો લેવાની દોડધામમાં લોકો રીતસરના લૂંટફાટ પર ઉતરી આવ્યાં હતા. એક તબક્કે તો રીતસરનું ધિંગાણુ થયું હોય તેવા દૃશ્યો સર્જાયાં, લોકોએ મંડપ તો તોડી નાંખ્યો હતો અને તેના લોખંડના થાંભલા અને ડેકોરેશનની ખુરશીઓ પણ લૂંટી ગયા. લૂંટફાટની આ ઘટનાની જાણ પોલીસને થતા વટવા પોલીસ દોડી આવી હતી. જો કે, આયજકોએ આ અંગે ફરિયાદ કરવાનું ટાળ્યું હતું.