કેનેડામાં PR અપાવવાનું કહી અમદાવાદના જીમ સંચાલકે આચરી લાખોની છેતરપિંડી

અમદાવાદ: કેનેડામાં મશરૂમની ખેતીના નામે PR અપાવવાનું કહીને અમદાવાદના જીમ સંચાલકે લાખો રૂપિયાની છેતરપિંડી આચરી હોવાની બોપલ પોલીસ સ્ટેશનમાં ફરિયાદ નોંધાઈ છે. પ્રાપ્ત માહિતી અનુસાર શહેરના શીલજ-થલતેજ રોડ પર જીમ ચલાવતા સુનિલ જૈન સલૂન શોપના મહિલા માલિક સહિત કેટલાંક લોકોને મશરૂમની ખેતીની ઓનલાઇન તાલીમ આપીને લાખોની ઠગાઈ કરી હતી. જેમાં રાજકોટના એક ફાઈનાન્સરને પણ 82 લાખનો ચૂનો લગાવ્યો હતો.

પોલીસ ફરિયાદ અનુસાર બોપલ વંસતબહાર રોડ પર આવેલા ક્રિષ્ના બંગ્લોઝમાં રહેતા પારૂલબેન રાણા શીલજ-થલતેજ રોડ પર ભાગીદારીમાં હેર સલૂન ચલાવે છે. તેમના સલૂન પર એક્ઝોટીકા જીમ આવેલુ છે. જેના માલિક સુનિલ જૈન હતા. જે અવારનવાર હેરસલૂનમાં હેર કટિંગ માટે આવતા હોવાને કારણે એકબીજાને ઓળખતા હતા. આ દરમિયાન 2020માં સુનિલે પારૂલબેનને વિદેશમાં સેટલ થવાની લાલચ આપી હતી.

ફરિયાદ મુજબ સુનિલે પારૂલબેનને કહ્યું હતું કે, તમે કેનેડા જઇને કામ કરો તો તમારા પરિવારનું ભવિષ્ય સુધરી જશે અને પરિવારને પણ વિદેશમાં સ્થાયી કરી શકાશે. જો કે, પારૂલબેનનો ખાસ ભણેલા ન હોવાથી તેમને પરીક્ષા આપીને જવુ શક્ય શક્ય નહોતું. તેથી સુનિલે તેમને ઓફર કરી કે, મશરૂમની ખેતીનું પ્રમાણપત્ર મેળવીને 50 લાખ ખર્ચીને કેનેડા જઈ શકાશે. જો કે, લોકડાઉન હોવાથી પારૂલબેન વિચાર માંડી વાળ્યો હતો.

જો કે, બાદમાં સુનિલે ફરીથી તેમને કેનેડા જવાની વાત કરી હતી અને 3 લાખમાં મશરૂમની ખેતીનું પ્રમાણપત્ર અપાવીને 25 લાખમાં જ કેનેડા મોકલવાનું કહેતા રૂપિયાની વ્યવસ્થા કરવા માટે પારૂલબેને પોતાની દુકાન ગીરવે મૂકીને 20 લાખ રૂપિયાની લોન લીધી હતી અને રૂપિયા ઠગ સુનિલને આપી દીધા હતા. પરંતુ સુનિલે કોઈ કાર્યવાહી ન કરી અને જીમ બંધ કરીને હરિયાણા ભાગી ગયો હતો.

આ સાથે એવું પણ જાણવા મળ્યું કે, સુનિલે આ જ મોડસ ઓપરેન્ડીથી પારૂલબેન ઉપરાંત અન્ય 3 લોકોને શિકાર બનાવ્યા હતા અને લાખો રૂપિયા ખંખેર્યા હતા. સુનિલે રાજકોટમાં પણ એક ફાઈનાન્સર પાસેથી અમદાવાદમાં જીમ બનાવવા માટે 82 લાખ વ્યાજે લીધા હતા જે પરત આપ્યા ન હોવાની પણ જાણવા મળ્યું છે. ફરિયાદના આધારે બોપલ પોલીસે સુનિલ સામે ગુનો નોંધીને આગળની તપાસ હાથ ધરી છે.