અમદાવાદ: શાહપુરમાં વિના વરસાદે ભૂવો પડ્યો! બે બાઈક અને એક રિક્ષા ગરકાવ

અમદાવાદ: અમદાવાદમાં ચોમાસામાં ભૂવા પડવા સામાન્ય બાબત છે, પરંતુ અહીંના શાહપુર વિસ્તારમાં તો વિના વરસાદે જ ભૂવો પડ્યો છે અને તે પણ લગભગ 12 ફૂટ જેટલો ઊંડો! આ ભૂવામાં બે બાઈક અને એક રિક્ષા ખાબકી હતી. સદનસીબે આ ઘટનામાં કોઈ જાનહાનિ થઈ નથી.

જાણવા મળ્યા મુજબ, અમદાવાદમાં મેટ્રોરેલના બીજા ફેઝનું કામ પુરજોરમાં ચાલી રહ્યું છે. તે દરમિયાન આજે ઈસ્ટ-વેસ્ટ કોરિડોરની અન્ડરગ્રાઉન્ડ રૂટની કામગીરી દરમિયાન શાહપુર દરવાજા પાસે મોટો ભૂવો પડ્યો હતો. તેમાં બે બાઈક અને એક રિક્ષા ગરકાવ થઈ ગઈ હતી. સદનસીબે આ ઘટનામાં કોઈને ઈજા થઈ નથી. ઘટનાને પગલે લોકોના ટોળેટોળાં ઉમટી પડ્યાં હતાં.
આજે (ગુરુવારે) બપોરના સમયે મેટ્રો રેલના બીજા તબક્કાના કામકાજ દરમિયાન મેટ્રો ટનલ પર મ્યુનિસિપલ કોર્પોરેશનની પાણીની પાઈપ લાઈનમાં ભંગાણ થતાં જમીન બેસી ગઈ હતી. મહત્વની વાત તો એ છે કે, આ પાઈપ લાઈન વર્ષો પહેલા નાખવામાં આવી છે અને તેનો કોર્પોરેશન પાસે ચોક્કસ નકશો પણ નથી.
ભૂવો પડવાના કારણે આ જગ્યાએ મેટ્રોનું કામ પણ રોકી દેવું પડ્યું છે. હાલ, કોર્પોરેશને લીકેજ ક્યાં થયું તે શોધી લીધું છે અને જીએમઆરસી દ્વારા તેનું સમારકામ શરૂ કરી દેવાયું છે. ઉલ્લેખનીય છે કે, અમદાવાદમાં ઠેર-ઠેર આવી જૂની પાઈપ લાઈનો છે. જે અંગે કોર્પોરેશનને પણ અત્યારે જાણ નહીં હોય. ઘણા જૂના નકશા અત્યારે ગુમ પણ થઈ ગયા હશે, જેના કારણે કોર્પોરેશનના અધિકારીઓને પણ ચોક્કસ ખબર નથી હોતી કે કઈ લાઈન ક્યાંથી પસાર થાય છે. એવામાં શહેરમાં રોડ-રસ્તાનું કામ કરતી વખતે કે આવા મેટ્રો જેવા મોટા પ્રોજેક્ટ પર કામ કરતી વખતે અવાર-નવાર પાઈપ લાઈનોમાં ભંગાણ પડવાની અને ભૂવા પડવાની ઘટનાઓ બનતી રહે છે.

રસ્તા પહોળા કરવાનું કામ હોય કે પછી મેટ્રોનું કે પછી બીજું એવું કામકાજ કે જેમાં જાહેર જગ્યાએ ખોદકામ કરવાની જરૂર પડતી હોય, તેવા કામમાં ઘણી વખત તંત્રની બેદરકારી સામે આવી છે. કોર્પોરેશનનું તંત્ર જે-તે એજન્સી સાથે યોગ્ય સંકલન રાખતું ન હોવાથી પાઈપ લાઈનો તૂટવાની અને જમીનમાં દાટેલા લાઈટના વાયરો કપાઈ જવાની ઘટનાઓ બનતી રહે છે. આ અંગે વારંવાર ફરિયાદો ઉઠવા છતાં તંત્રના પેટનું પાણી હલતું નથી અને છેવટે તો સામાન્ય નાગરિકોને પરેશાન થવું પડે છે.