અ'વાદઃ સોશિયલ ડિસ્ટન્સિંગના ભંગ બદલ મેકડોનાલ્ડ સહિત અન્ય એક ઓફિસ સીલ

અમદાવાદઃ સોમવારે અમદાવાદ વન મોલ સીલ કર્યા બાદ અમદાવાદ મહાનગરપાલિકાના સોલિડ વેસ્ટ ડિપાર્ટમેન્ટે મંગળવારે કોવિડ-19ના નિયમોનું ઉલ્લંઘન કરવા બદલ સેવિયર ફાર્માસ્યુટિકલની ઓફિસ અને હિમાલયા મોલમાં આવેલા મેકડોનાલ્ડના આઉટલેટને સીલ કર્યું હતું.

સોલિડ વેસ્ટ ડિપાર્ટમેન્ટના ડિરેક્ટર હર્ષદ સોલંકીએ કહ્યું કે, સીલ કરાયેલી સેવિયર ફાર્માસ્યુટિકલની ઓફિસ કોર્પોરેટ રોડ પર સ્થિત સિનર્જી બિલ્ડિંગમાં આવેલી છે. જેનો સ્ટાફ માસ્ક પહેર્યા વગર અને સોશિયલ ડિસ્ટન્સિંગનું ઉલ્લંઘન કરતો જોવા મળ્યો હતો. સીલ કરાયેલી ઓફિસ બિલ્ડિંગના 11મા માળે આવેલી છે.

સોલિડ વેસ્ટ ડિપાર્ટમેન્ટની ટીમે હિમાલયા મોલમાં આવેલા મેકડોનાલ્ડના આઉટલેટમાં પણ તપાસ હાથ ધરી હતી. જ્યાં સોશિયલ ડિસ્ટન્સિંગનું ઉલ્લંઘન થતું જોવા મળ્યું હતું, આટલું જ નહીં તેના ગ્રાહકોએ પણ માસ્ક પહેર્યું નહોતું.

સોલિડ વેસ્ટ ડિપાર્ટમેન્ટના અધિકારીઓેએ કહ્યું કે, નિયમો પ્રમાણે બે ગ્રાહકો વચ્ચે અંતર હોવું જોઈએ પરંતુ મેકડાનાલ્ડમાં ગ્રાહકો એકબીજાને અડીને બેઠા હતા. આ સિવાય ફૂડ ખાતી વખતે તેમને માસ્ક ઉતારવું પડે છે, જેના કારણે અન્ય ગ્રાહકોને ઈન્ફેક્શન થવાનો ખતરો વધી જાય છે.

સોલંકીએ વધુમાં કહ્યું કે, ડિપાર્ટમેન્ટની ટીમે ઓફિસો, શો રુમ, મોલ્સ અને રેસ્ટોરાંમાં પણ ચેકિંગ હાથ ધરવાનું નક્કી કર્યું છે.