ઇન્ટરમિડિયેટ્સના ભાવ વધારાથી ડાયસ્ટફ ઉદ્યોગ મુશ્કેલીમાં મુકાયો

નવગુજરાત સમય > અમદાવાદ

– ચીનમાં કેટલાક મહત્ત્વના ઇન્ટરમિડિયેટ્સના ઉત્પાદનમાં ઘટાડો થતાં તેના વૈશ્વિક ભાવમાં ઉછાળો આવ્યો છે અને તેની અસર રાજ્યના મહત્ત્વના ડાયસ્ટફ ઉદ્યોગ પર જોવા મળી રહી છે. લગભગ બે મહિના પહેલાં પણ ઇન્ટરમિડિયેટ્સના અણધાર્યા ભાવ વધારાના કારણે રાજ્યના ડાયસ્ટફ ઉત્પાદકો મુશ્કેલીમાં મૂકાયા હતા અને હવે તેમણે ભાવના સ્પેક્યુલેશનની ગણતરી કરીને જ ઓર્ડર ક્વોટ કરવાનું શરૂ કર્યું છે. પ્રમાણમાં નીચી માંગ અને રો-મટિરિયલના ઊંચા ભાવના કારણે રાજ્યના મોટાભાગના ડાયસ્ટફ યુનિટ્સ ૬૦ ટકા જેટલું જ કેપેસિટી યુટિલાઇઝેશન કરી રહ્યા છે. ગુજરાત ચેમ્બર ઓફ કોમર્સ એન્ડ ઇન્ડસ્ટ્રી (જીસીસીઆઇ)ના સિનિયર ઉપપ્રમુખ શૈલેષ પટવારીએ જણાવ્યું હતું કે, “ઇન્ટરમિડિયેટ્સના ભાવ વધારાની અસર ડાયસ્ટફ ઉદ્યોગ પર મોટા પ્રમાણમાં જોવા મળી રહી છે. છેલ્લાં એક મહિનામાં વિવિધ ઇન્ટરમિડિયેટ્સના ભાવમાં નોંધપાત્ર વધારો થયો છે, જેમ કે વિનાઇલ સલ્ફોનનો ભાવ પ્રતિ કિગ્રા ~૨૬૦થી વધીને ~૩૫૦ પર પહોંચ્યો છે અને એચ-એસિડ પણ ~૩૨૦થી વધીને ~૩૭૦ થયો છે. ચીનમાં ઉત્પાદન ઘટ્યું છે તેથી આંતરરાષ્ટ્રીય બજારમાં ભાવ વધારો થયો છે અને સ્થાનિક કંપનીઓએ પણ ભાવ વધાર્યા છે. ઉપરાંત, ઇન્ટરમિડિયેટ્સની ખરીદીમાં અગાઉ લાંબી પેમેન્ટ સાઇકલ હતી તે પણ લગભગ બંધ થઇ છે. રાજ્યના મોટાભાગના ડાયસ્ટફ યુનિટ્સ માત્ર ૬૦ ટકા ક્ષમતા પર કાર્યરત છે.” ગુજરાતના ડાયસ્ટફ યુનિટ્સ ૫૦ ટકા જેટલા ઇન્ટરમિડિયેટ્સની ચીનથી આયાત કરે છે અને ચીનમાં વારંવાર ઉત્પાદનમાં થતા વધારા-ઘટાડાની સીધી અસર સ્થાનિક ડાયસ્ટફ ઉદ્યોગ પર જોવા મળે છે. ગુજરાત ડાયસ્ટફ્સ મેન્યુફેક્ચરર્સ એસો. (જીડીએમએ)ના પ્રમુખ ભૂપેન્દ્ર પટેલે જણાવ્યું હતું કે, “ઇન્ટરમિડિયેટ્સના ભાવ ઊચ્ચત્તમ સ્તરેથી નોંધપાત્ર ઘટ્યા હતા પરંતુ ફરી ભાવ વધારો શરૂ થતાં રાજ્યના ૧,૨૦૦થી વધુ ડાયસ્ટફ યુનિટો મુશ્કેલીનો સામનો કરી રહ્યા છે. ચીનમાં કેટલાક યુનિટ્સનું ઉત્પાદન બંધ થવાથી વિનાઇલ સલ્ફોનના આંતરરાષ્ટ્રીય ભાવ વધ્યા છે. જોકે, ભાવ વધારા કરતાં વધુ નિર્ણાયક બાબત ભાવની અનિશ્ચિતતા બની રહી છે. જો ભાવ કોઇ પણ સ્તરે સ્થિર થશે તો જ ઉદ્યોગમાં નફાકારક બિઝનેસ શક્ય બનશે.”