સિવિક સેન્ટરોમાં જમા થતાં નાણાંમાંથી લાખોની ઉચાપતનાં કૌભાંડનો પર્દાફાશ

નવગુજરાત સમય > અમદાવાદ

– નવા ઝોનનાં બોડકદેવ સિવિક સેન્ટરમાં જમા થતાં નાણાં મ્યુનિ. એકાઉન્ટ ખાતામાં જમા કરાવવાને બદલે તેમાંથી લાખો રૂપિયાની ઉચાપત કરવાનાં કૌભાંડનો પર્દાફાશ થયો છે, તેમ છતાં જવાબદારોને બચાવવાના પ્રયાસો હાથ ધરાયાં હોવાનું જાણવા મળ્યું છે. નવા ઝોનનાં બોડકદેવ સિટી સિવિક સેન્ટરમાં નાગરિકો દ્વારા જમા કરાવાતાં નાણાં ગણીને મ્યુનિ. એકાઉન્ટ ખાતામાં જમા કરાવવાની જવાબદારી જેમના શિરે છે તેવા બે કેશિયરોએ જ ભેગા મળી 45 લાખ રૂપિયાની ઉચાપત કરી હોવાનું પ્રાથમિક તપાસમાં બહાર આવતાં જ ખળભળાટ મચી જવા પામ્યો છે. એકાઉન્ટ ખાતાનાં બે કેશિયરો બોડકદેવ સિવિક સેન્ટરમાં જમા થતાં નાણાંમાંથી ઇમ્પેક્ટ ફીનાં નાણાંને જ નિશાન બનાવી તેમાંથી દરરોજ 20 હજારથી માંડીને ચાર લાખ સુધીનાં નાણાંની ઉચાપત કરી એકાઉન્ટ ખાતામાં ઓછા નાણાં જમા કરાવતાં હતા. ફકત એક જ મહિનામાં બે કેશિયરોએ 11.50 લાખની ઉચાપત કરી હોવાનાં કૌભાંડનો પર્દાફાશ થયો હતો. જ્યારે બિનસત્તાવાર સૂત્રોએ 45 લાખનો પર્દાફાશ થયો હોવાનો દાવો કર્યો હતો. ચીફ એકાઉન્ટન્ટ, ડે.ચીફ એકાઉન્ટન્ટથી માંડીને આસી.મેનેજરો સુધીનો મોટો કાફલો ધરાવતાં એકાઉન્ટ ખાતામાં સિવિક સેન્ટરમાંથી આવતાં નાણાંના રિપોર્ટને જોવાની તસ્દી કોઇ લેતું નહોતું કે તેમાં તેમનો પણ હિસ્સો મળવી લેતાં હતા તેવો સવાલ પૂછાઇ રહ્યો છે. કૌભાંડનો પર્દાફાશ થતાં અને બન્ને કેશિયરને સસ્પેન્ડ કરવાને બદલે બચાવવાનાં પ્રયાસોની જાણ કમિશનર મુકેશ કુમારને થતાં તેઓ ચોંકી ઉઠયા હતા તેમણે હાલ તો વિજિલન્સ તપાસ કરવા અને તપાસ અધિકારીને પોલીસ ફરિયાદ નોંધાવવા સૂચના આપી હોવાનું જાણવા મળ્યું છે. કૌભાંડમાં સંડોવાયેલાં બે કેશિયરો કૌશિક પટેલ તથા અનિલ પ્રજાપતિ ભાજપનાં એક આગેવાનને શરણે પહોંચી જતાં હવે તેમને બચાવવાનાં પ્રયાસો થઇ રહ્યાં છે. મ્યુનિ.કમિશનરે બુધવારે વીકલી મિટીંગમાં આ કૌભાંડનો ઉલ્લેખ કરવાને બદલે તમામ ઝોનનાં સિવિક સેન્ટરોમાં જમા થતાં નાણાં બેંકો બારોબાર લઇ જાય તેવી સિસ્ટમ ગોઠવવા સૂચના આપી હતી.