ચૂંટણી ટાળવા માટે ચેમ્બર ઓફ કોમર્સના હોદ્દેદારોના ‘પ્રયત્નો’

નવગુજરાત સમય > અમદાવાદ

ગુજરાત ચેમ્બર ઓફ કોમર્સ એન્ડ ઇન્ડસ્ટ્રી (GCCI)માં પેટ્રન-લાઇફ, જનરલ અને બિઝનેસ એસોસિએશન કેટેગરીમાં ચૂંટણી ટાળવા માટે હોદ્દેદારો દ્વારા પ્રયત્નો કરાઈ રહ્યા છે અને શનિવારે સ્થિતિ સ્પષ્ટ થવાની ધારણા છે. સામાન્ય કારોબારી સભ્યની સ્થાનિક કેટેગરીમાં કોઇપણ બે સભ્યો દાવેદારી પરત ખેંચી લે અને પેટ્રન લાઇફ કેટેગરીમાં પણ એક સભ્ય દાવેદારી પરત ખેંચી લે તે માટે પ્રયત્નો ચાલી રહ્યા છે.

૧૮ જૂનના રોજ યોજાનારી ચૂંટણી માટે ઉમેદવારી પરત ખેંચવાની છેલ્લી તારીખ પહેલી જૂન હતી. જોકે ચૂંટણી અગાઉના એક દિવસ સુધી કોઇપણ ઉમેદવાર લેખિતમાં ચૂંટણી લડવાની અનિચ્છા દર્શાવી શકે છે. સૂત્રોના જણાવ્યા મુજબ, જનરલ કેટેગરીની બહારગામની ચાર બેઠકો માટે પાંચ ઉમેદવારો છે અને તેમાં એક ઉમેદવાર પોતાની દાવેદારી પરત ખેંચી લેશે તે નક્કી થઇ ગયું છે. જોકે, સ્થાનિક કેટેગરીમાં ચૂંટણી ટાળવી મુશ્કેલ હોવાથી ચેમ્બરના અગ્રણીઓ મિટિંગોનો દૌર ચલાવી રહ્યા છે.

સૂત્રોના જણાવ્યા મુજબ, વિવિધ ક્લબ સાથે સંકળાયેલા ઉમેદવારોને સમજાવવા ક્લબ સર્કલના અગ્રણીઓ સાથે પણ ચેમ્બરના અગ્રણીઓએ બેઠક કરી હતી, પરંતુ ચેમ્બરના સૂત્રોએ તેની પુષ્ટિ કરી નહોતી.

ચેમ્બરના હાલના સિનિયર ઉપ પ્રમુખ અને નવા પ્રમુખ તરીકે ટૂંક સમયમાં હોદ્દો ગ્રહણ કરવા જઇ રહેલા બિપીનભાઇ પટેલે જણાવ્યું હતું કે, “અમે કોઇ પેનલની રચના કરવા માંગતા નથી. કારણ કે ચૂંટણીમાં ઊભા રહેલા તમામ ઉમેદવારો એકબીજા સાથે સંકળાયેલા જ છે અને તેથી જ અમે ચૂંટણી ટાળવા પ્રયત્ન કરી રહ્યા છીએ. ગયા વર્ષે ઉપ પ્રમુખના પદ માટે ચૂંટણી થઇ હતી પરંતુ આ વર્ષે ટોચના હોદ્દાઓ બિનહરિફ થયા છે. ચેમ્બરમાં વિવિધ કેટેગરીમાં બહુ થોડા ઉમેદવારના કારણે ચૂંટણીની સ્થિતિ સર્જાઇ છે. હાલમાં સમજાવટના પ્રયત્નો ચાલી રહ્યા છે.”