અમદાવાદઃ ટ્રાફિક મેમોથી શરુ થયેલી PSI અને યુવતીની પ્રેમ કહાણીનો 6 મહિનામાં જ આવ્યો અંત

અમદાવાદ: દોઢ વર્ષ પહેલા ટ્રાફિક મેમોથી શરૂ થયેલી PSI અને યુવતી વચ્ચેની લવસ્ટોરી લગ્નના છ માસમાં ભંગાણને આરે પહોંચી છે. યુવતીએ મહિલા પશ્ચિમ પોલીસ સ્ટેશનમાં PSI પતિ સહિત સાસરિયાં વિરુદ્ધ ફરિયાદ નોંધાવતા હવે મહિલા પોલીસે તપાસ શરૂ કરી છે. યુવતીએ આક્ષેપ કર્યા છે કે, તેના પતિએ રિવોલ્વરથી જાનથી મારવાની ધમકી આપી હતી. આટલું જ નહીં પણ PSIના પ્રેમમાં મહિલાએ અગાઉના પતિને છૂટાછેડા આપી બીજા લગ્ન કર્યા હતા.

સમગ્રન ઘટના મુજબ જગતપુર ખાતે રહેતી 34 વર્ષીય યુવતી ગત જૂન માસમાં 2019ના રોજ સાંજે કારગીલ પંપ પાસેથી નીકળી હતી. ત્યારે ત્યાં PSI સાગર આચાર્યએ કોઈપણ ડોક્યુમેન્ટ માંગ્યા વગર યુવતીનું એક્ટિવા ડીટેઈન કર્યું હતું. યુવતીએ PSIને નામ પૂછતાં તે ઉશ્કેરાયા હતા. યુવતીએ PSIનો ફોટો પાડતા સ્ટાફે ધ્યાન દોરતા PSIએ તેના મોબાઇલમાંથી ફોટો ડિલીટ કરાવ્યો હતો. જોકે બાદમાં ટ્રાફિક મેમોમાં ભૂલ હોવાથી યુવતી બીજા દિવસે ફરી સ્થળ પર ગઈ હતી. તે સમયે PSI સાગરે પોતાનો મોબાઈલ નંબર આપી RTO દંડ ભરવામાં કોઈ તકલીફ થાય તો ફોન કરવા જણાવ્યું હતું. જે બાદ ફોન પાર વાતચીત હાય-હલ્લોથી મિત્રતા અને પછી પ્રેમ પાંગર્યો હતો. PSI સાગર આચાર્યએ, યુવતી સમક્ષ લગ્નનો પ્રસ્તાવ મૂકયો અને જણાવ્યું કે, તું તારા પતિથી છૂટાછેડા લઈ લે. જેના પગલે રૂચિતાએ તેના અગાઉના પતિથી છૂટાછેડા લીધા હતા અને વર્ષ 2020માં રોજ સાગર આચાર્ય સાથે લગ્ન કર્યા હતા.

યુવતીએ પોલીસ ફરિયાદમાં જણાવ્યું છે કે, દોઢ વર્ષ પહેલા કારગીલ પંપ પાસે PSI સાગર આચાર્ય સાથે ટ્રાફિક મેમોને લઈ મુલાકાત થઈ હતી બાદમા એક વર્ષ પછી મહિલા એ પોતાના પતિને છુટાછેડા આપી PSI સાથે લગ્ન કર્યા હતા.

યુવતીએ તેના પહેલા પતિને છૂટાછેડા આપ્યા હતા બાદમાં PSI સાગર આચાર્ય સાથે લગ્ન કર્યા હતા. લગ્નના 20 દિવસમાં પતિ સાથે ઝઘડા થવા લાગ્યા હતા. ત્યારબાદ, માથાકૂટ વધતાં પોલીસ સ્ટેશન સુધી વાત પહોંચી છે.

લગ્ન બાદ લાજ કાઢવા બાબતે અને કપડા પહેરવા જેવી અલગ-અલગ બાબતે સાસુ-સસરા તકરાર કરતા હતા. PSI પતિ દારૂ પીને ઘરે આવી યુવતી જોડે મારઝૂડ કરતો. નણંદને વાત કરતા તે ગણકારતી ન હતી. સાસરિયાએ યુવતીને ઘરમાંથી કાઢી મુકતા તે પતિએ ભાડે રાખેલ અમદાવાદના મકાને આવી ગઈ હતી. જ્યાં સાસુએ પતિ સાથે આવી માથાકૂટ કરી હતી અને પતિએ રિવોલ્વરથી મારવાની ધમકી આપી હતી.

અમદાવાદના મકાનનો સામાન પણ લઈ જઇ સાસરિયાએ યુવતીને ઘર ખાલી કરવા અને છૂટાછેડા આપી દેવા દબાણ કર્યું હતું.. જે તમામ આક્ષેપો ને લઈ મહિલા પોલીસે તપાસ શરૂ કરી છે.