ઉત્તર ગુજરાતમાં મેઘરાજાની બેટિંગ શરુ, હજુ બે દિવસ ભારે વરસાદની આગાહી

અમદાવાદઃ ઉત્તર ગુજરાતમાં મહેસાણા, પાટણ, સિદ્ધપુર, ડીસા, પાલનપુર, અમીરગઢ, બનાસકાંઠા, સાબરકાંઠામાં રક્ષાબંધનના દિવસથી વરસાદ વરસી રહ્યો છે અને આગામી સમયમાં સારો વરસાદ થવાની આગાહી હવામાન વિભાગ દ્વારા વ્યક્ત કરવામાં આવી છે. હવામાન વિભાગની આગાહી પ્રમાણે આજે અને આગામી સમયમાં તોફાની વરસાદ થવાની સંભાવના હવામાન વિભાગ દ્વારા વ્યક્ત કરવામાં આવી છે. પાટણ, સિદ્ધપુર, અમીરગઢ, ડીસા, પાલનપુર, બનાસકાંઠામાં ધીમીધારે રાત્રે થયેલા વરસાદ બાદ ઠેર-ઠેર પાણી ભરાયા છે.ગાંધીનગરઃ ઝરમર-ઝરમર વરસાદ હવામાન વિભાગના આંકડા પ્રમાણે રાજ્યમાં પાછલા 12 કલાકમાં ડીસામાં 77.7mm વરસાદ વરસ્યો છે. રાતથી સવારના સાડા 8 વાગ્યા સુધીના આંકડા પ્રમાણે ડીસા પછી વડોદરામાં 27.2mm, રાજકોટમાં 27mm, ભાવનગરમાં 11mm, વલસાડમાં 6mm, પોરબંદરમાં 5.5mm, અમદાવાદમાં 4.2mm, ગાંધીનગરમાં 4mm વરસાદ નોંધાયો છે.હવામાન વિભાગની આગાહી પ્રમાણે આગામી 24 કલાકમાં ઉત્તર ગુજરાતમાં ભારે વરસાદ થઈ શકે છે. રાજ્યમાં ઉત્તર ગુજરાતની સાથે વલસાડ સહિત દક્ષિણ ગુજરાત અને સૌરાષ્ટ્રમાં પણ વરસાદ નોંધાઈ શકે છે. આજના દિવસમાં ઉત્તર ગુજરાત, કચ્છ અને સૌરાષ્ટ્રમાં વરસાદ થવાની સંભાવના છે. જ્યારે 17 તારીખે સૌરાષ્ટ્રના દ્વારકા, જામનગર, પોરબંદર, રાજકોટ, મોરબી, સુરેન્દ્રનગર અને કચ્છમાં ગાજવીજ સાથે વરસાદ થવાની સંભાવના છે.અમદાવાદમાં પણ આગામી ત્રણ દિવસ સુધી વરસાદી માહોલ રહેશે. આગામી દિવસોમાં પણ સામાન્ય વરસાદ થવાની સંભાવના વ્યક્ત કરાઈ રહી છે. અમદાવાદના લગભગ તમામ વિસ્તારોમાં રક્ષાબંધનની બપોરથી ઝરમર-ઝરમર વરસાદ વરસી રહ્યો છે અને આગામી સમયમાં પણ આવો વરસાદ વરસતો રહેશે તેવી આગાહી છે.